na kuchh takrar tumko hai na kuchh shikwa hamara hai

na kuchh takrār tum ko hai na kuchh shikva hamārā hai

ye dil kyā chiiz hai ab jaan tak denā gavārā hai

dam-e-raftār uThā fitne qayāmat kā ishāra hai

tirā muñh dekhnā ḳhurshed-e-mahshar ko nazārā hai

vo mah-rū ai falak phirtā hai har shab merī āñkhoñ meñ

tasavvur ne mire ġham-ḳhāne meñ ik chāñd taarā hai

sar-e-bālīñ na paayā tujh ko ai iisā to ghabrā kar

shab-e-furqat meñ izrā.īl ko ham ne pukārā hai

falak qātil hai teġh-e-māh-e-nau ke zaḳhm haiñ tan par

shafaq hai ḳhuuñ hamārā chāñdnī ne ham ko maarā hai

bajā hai tujh se ai but ḳhalq ko da.avā mohabbat kā

ḳhudā vāhid hai par har shaḳhs kahtā hai hamārā hai

maiñ huuñ ai ham-safīr-e-bulbul-e-zār is gulistāñ kā

jo Theke meñ hai sayyādoñ ke gulchīñ kā ijārā hai

na pūchho haal kuchh dil kī lagī kā mujh jale tan kī

jahannum jis ko kahte haiñ vo is kā ik sharārā hai

siyah-kārī hī maiñ ne umr bhar kī tīra-baḳhtī se

tirā hāl-e-siyah kyā merī qismat kā sitāra hai

mujhe bhī paar utarnā hai Dubo kar kashtī-e-tan ko

kinārā gor kā gar bahr-e-ulfat kā kinārā hai

girā huuñ kyā judā.ī meñ ba-zor-e-nā-tavānī se

na tāqat aah karne kī na uf karne kā yaarā hai

nikaltā hai mirā dam majma-e-yārāñ hai bālīñ par

na muñh se baat hotī hai na āñkhoñ se ishāra hai

faroġh-e-ḳhāl rū-e-ātishīñ par ho nahīñ mumkin

kahīñ ḳhurshed ke bhī sāmne chamkā sitāra hai

banāyā dāna-e-añgūr kā kanThā hai mastī meñ

chaman meñ bahar-e-mai-ḳhvārī kiyā jab istiḳhārā hai

kisī sūrat mirī baḳhshish nahīñ ai 'arsh' hai mumkin

payambar kā vasīla abr-e-rahmat kā sahārā hai

na kuchh takrar tum ko hai na kuchh shikwa hamara hai

ye dil kya chiz hai ab jaan tak dena gawara hai

dam-e-raftar uTha fitne qayamat ka ishaara hai

tera munh dekhna KHurshed-e-mahshar ko nazara hai

wo mah-ru ai falak phirta hai har shab meri aankhon mein

tasawwur ne mere gham-KHane mein ek chand tara hai

sar-e-baalin na paya tujh ko ai isa to ghabra kar

shab-e-furqat mein izrail ko hum ne pukara hai

falak qatil hai tegh-e-mah-e-nau ke zaKHm hain tan par

shafaq hai KHun hamara chandni ne hum ko mara hai

baja hai tujh se ai but KHalq ko dawa mohabbat ka

KHuda wahid hai par har shaKHs kahta hai hamara hai

main hun ai ham-safir-e-bulbul-e-zar is gulistan ka

jo Theke mein hai sayyaadon ke gulchin ka ijara hai

na puchho haal kuchh dil ki lagi ka mujh jale tan ki

jahannum jis ko kahte hain wo is ka ek sharara hai

siyah-kari hi main ne umr bhar ki tira-baKHti se

tera haal-e-siyah kya meri qismat ka sitara hai

mujhe bhi par utarna hai Dubo kar kashti-e-tan ko

kinara gor ka gar bahr-e-ulfat ka kinara hai

gira hun kya judai mein ba-zor-e-na-tawani se

na taqat aah karne ki na uf karne ka yara hai

nikalta hai mera dam majma-e-yaran hai baalin par

na munh se baat hoti hai na aankhon se ishaara hai

farogh-e-KHal ru-e-atishin par ho nahin mumkin

kahin KHurshed ke bhi samne chamka sitara hai

banaya dana-e-angur ka kanTha hai masti mein

chaman mein bahar-e-mai-KHwari kiya jab istiKHara hai

kisi surat meri baKHshish nahin ai 'arsh' hai mumkin

payambar ka wasila abr-e-rahmat ka sahaara hai