na mal-o-zar hai na saghar na baada rakhte hain

na māl-o-zar hai na sāġhar na baada rakhte haiñ

ho koī haal magar dil kushāda rakhte haiñ

mile haiñ ranj bahut phir bhī haiñ umiid se kam

ham is jahāñ se tavaqqo ziyāda rakhte haiñ

baḌhā.e haath koī dost ho ki dushman ho

ham ahl-e-ishq haiñ dāman kushāda rakhte haiñ

hamāre ishq meñ rang-e-havas ko daḳhl nahīñ

mizāj-e-ishq azal hī se saada rakhte haiñ

ġham-e-jahāñ se kabhī kam huī na mastī-e-zīst

hanūz nashsha-e-hastī ziyāda rakhte haiñ

na tang-dil haiñ na kam-hausla na tang-nazar

dil-o-nigāh hamesha kushāda rakhte haiñ

'payām' ziist pe miTnā unhīñ ko aatā hai

jo zindagī se mohabbat ziyāda rakhte haiñ

na mal-o-zar hai na saghar na baada rakhte hain

ho koi haal magar dil kushada rakhte hain

mile hain ranj bahut phir bhi hain umid se kam

hum is jahan se tawaqqo ziyaada rakhte hain

baDhae hath koi dost ho ki dushman ho

hum ahl-e-ishq hain daman kushada rakhte hain

hamare ishq mein rang-e-hawas ko daKHl nahin

mizaj-e-ishq azal hi se sada rakhte hain

gham-e-jahan se kabhi kam hui na masti-e-zist

hanuz nashsha-e-hasti ziyaada rakhte hain

na tang-dil hain na kam-hausla na tang-nazar

dil-o-nigah hamesha kushada rakhte hain

'payam' zist pe miTna unhin ko aata hai

jo zindagi se mohabbat ziyaada rakhte hain