na mehr-o-mah na anjum ke darmiyan mein hai

na mehr-o-māh na anjum ke darmiyān meñ hai

javāb terā zamīñ par na āsmān meñ hai

lagā rahe haiñ mazāmīn-e-nau ke ham ambār

hamārī fikr kā taa.ir abhī uḌaan meñ hai

vafā ḳhulūs-o-mohabbat sharāfat-o-tahzīb

asāsa ab yahī baaqī mire makān meñ hai

tirā nishāna koī bhī ḳhatā nahīñ hotā

tilism kaun sā āḳhir tirī kamān meñ hai

ye aur baat ki īmāñ se dil hue ḳhālī

magar asar vahī sajde meñ aur azaan meñ hai

muḳhālifīn taraf-dār ho ga.e tere

na jaane kaun sā jaadū tirī zabān meñ hai

purāne vaqtoñ kī bāteñ na kījiye ham se

kahāñ vo jazba-e-īsār ḳhāndān meñ hai

lab-e-ḳhamosh se kahtā hai 'ilm kā hai panja

ḳhudā kī fauj kī 'azmat isī nishān meñ hai

vahāñ pe koshisheñ mirrīḳh par pahuñchne kī

yahāñ bashar abhī masrūf fikr-e-nān meñ hai

sunā hai qissa-e-ġham jis ne royā hai paiham

'ajīb dard 'kashish' terī dāstān meñ hai

na mehr-o-mah na anjum ke darmiyan mein hai

jawab tera zamin par na aasman mein hai

laga rahe hain mazamin-e-nau ke hum ambar

hamari fikr ka tair abhi uDan mein hai

wafa KHulus-o-mohabbat sharafat-o-tahzib

asasa ab yahi baqi mere makan mein hai

tera nishana koi bhi KHata nahin hota

tilism kaun sa aaKHir teri kaman mein hai

ye aur baat ki iman se dil hue KHali

magar asar wahi sajde mein aur azan mein hai

muKHalifin taraf-dar ho gae tere

na jaane kaun sa jadu teri zaban mein hai

purane waqton ki baaten na kijiye hum se

kahan wo jazba-e-isar KHandan mein hai

lab-e-KHamosh se kahta hai 'ilm ka hai panja

KHuda ki fauj ki 'azmat isi nishan mein hai

wahan pe koshishen mirriKH par pahunchne ki

yahan bashar abhi masruf fikr-e-nan mein hai

suna hai qissa-e-gham jis ne roya hai paiham

'ajib dard 'kashish' teri dastan mein hai