na mera etibar un ko na mujhko etibar apna

na merā e'tibār un ko na mujh ko e'tibār apnā

na hotā kaash apne vāste dil be-qarār apnā

na koī rāz-dāñ apnā na koī mehrbāñ apnā

na koī ham-zabān apnā na koī ġham-gusār apnā

na koī gulsitāñ apnā na koī āshiyāñ apnā

na koī dar na koī ghar na koī hai dayār apnā

qafas kī āfatoñ kā Dar na ḳhushiyāñ āshiyāne kī

bahār apnī na gul apnā kalī apnī na ḳhaar apnā

asar apnā na ġham apnā na sang apnā na sar apnā

na dard apnā na dil apnā na maiñ apnā na yaar apnā

na shām-e-ġham kī tārīkī na tanhā.ī kī māyūsī

na chashm-e-ashk-e-bār apnī na vaqt-e-intizār apnā

hameñ ik baar mar kar phir agar jiinā nahīñ paḌtā

to aisī ziist kā phir ġham bhī hotā musta'ār apnā

satātī hai mujhe din-rāt apnī bebasī 'sālik'

taḳhayyul baarī baarī se tasavvur baar baar apnā

na mera e'tibar un ko na mujh ko e'tibar apna

na hota kash apne waste dil be-qarar apna

na koi raaz-dan apna na koi mehrban apna

na koi ham-zaban apna na koi gham-gusar apna

na koi gulsitan apna na koi aashiyan apna

na koi dar na koi ghar na koi hai dayar apna

qafas ki aafaton ka Dar na KHushiyan aashiyane ki

bahaar apni na gul apna kali apni na KHar apna

asar apna na gham apna na sang apna na sar apna

na dard apna na dil apna na main apna na yar apna

na sham-e-gham ki tariki na tanhai ki mayusi

na chashm-e-ashk-e-bar apni na waqt-e-intizar apna

hamein ek bar mar kar phir agar jina nahin paDta

to aisi zist ka phir gham bhi hota musta'ar apna

satati hai mujhe din-raat apni bebasi 'salik'

taKHayyul bari bari se tasawwur bar bar apna