na mohtasib se ye mujhko gharaz na mast se kaam

na mohtasib se ye mujh ko ġharaz na mast se kaam

mujhe to lenā hai saaqī ke aaj dast se kaam

sanam tū merī parastish kī qadr tab jaane

ki jab paḌe tujhe kāfir ḳhudā-parast se kaam

maiñ gosha-gīr huā sair kar nasheb o farāz

rahā na mere qadam ko buland o past se kaam

rakhe hai shīsha mirā sañg saath rabt-e-qadīm

ki aaTh pahr mire dil ko hai shikast se kaam

jise masāvī hai maazī o haal o mustaqbil

use rahā nahīñ ā.inda būd-o-hast se kaam

maiñ kufr o diiñ se guzar kar huā huuñ lā-maz.hab

ḳhudā-parast se matlab na but-parast se kaam

kisū ko qaid kare hai kisū ko bāñdhe hai

vo le hai apne amal biich band-o-bast se kaam

dil us kī zulf ke pechoñ meñ 'hātim' uljhā hai

rakhe nahīñ hai mirā said daam o shust se kaam

na mohtasib se ye mujh ko gharaz na mast se kaam

mujhe to lena hai saqi ke aaj dast se kaam

sanam tu meri parastish ki qadr tab jaane

ki jab paDe tujhe kafir KHuda-parast se kaam

main gosha-gir hua sair kar nasheb o faraaz

raha na mere qadam ko buland o past se kaam

rakhe hai shisha mera sang sath rabt-e-qadim

ki aaTh pahr mere dil ko hai shikast se kaam

jise masawi hai mazi o haal o mustaqbil

use raha nahin aainda bud-o-hast se kaam

main kufr o din se guzar kar hua hun la-mazhab

KHuda-parast se matlab na but-parast se kaam

kisu ko qaid kare hai kisu ko bandhe hai

wo le hai apne amal bich band-o-bast se kaam

dil us ki zulf ke pechon mein 'hatim' uljha hai

rakhe nahin hai mera said dam o shust se kaam