na muddai na koi muddaa lage hai mujhe

na mudda.ī na koī mudda.ā lage hai mujhe

ajiib rang kī dil meñ fazā lage hai mujhe

burā na maano to tum se maiñ ek baat kahūñ

ye guftugū kā tarīqa burā lage hai mujhe

hazār jurm pe bhī hai mirā karam-farmā

maiñ kyā batā.ūñ ki vo shoḳh kyā lage hai mujhe

vo ḳhūb-rū bhī hai dilbar bhī aur dil-ārā bhī

magar vo shoḳh kuchh is se sivā lage hai mujhe

maiñ chheḌtā huuñ use aur vo kosne de hai

magar ye kosnā jaise duā lage hai mujhe

jo paas aan ke baiThe chaman sā khil jaa.e

chale to jumbish-e-bād-e-sabā lage hai mujhe

ḳhirām-e-bād-e-sabā laakh gul-nishāñ ho jaa.e

kisī kī chaal kī jhūTī adā lage hai mujhe

ye lāla-o-gul-o-nargis ye abr-o-bād-e-chaman

kisī ke jism kī utrī qabā lage hai mujhe

tamām aasre bekār-e-mahz haiñ 'naqvī'

usī kā aasrā bas aasrā lage hai mujhe

na muddai na koi muddaa lage hai mujhe

ajib rang ki dil mein faza lage hai mujhe

bura na mano to tum se main ek baat kahun

ye guftugu ka tariqa bura lage hai mujhe

hazar jurm pe bhi hai mera karam-farma

main kya bataun ki wo shoKH kya lage hai mujhe

wo KHub-ru bhi hai dilbar bhi aur dil-ara bhi

magar wo shoKH kuchh is se siwa lage hai mujhe

main chheDta hun use aur wo kosne de hai

magar ye kosna jaise dua lage hai mujhe

jo pas aan ke baiThe chaman sa khil jae

chale to jumbish-e-baad-e-saba lage hai mujhe

KHiram-e-baad-e-saba lakh gul-nishan ho jae

kisi ki chaal ki jhuTi ada lage hai mujhe

ye lala-o-gul-o-nargis ye abr-o-baad-e-chaman

kisi ke jism ki utri qaba lage hai mujhe

tamam aasre bekar-e-mahz hain 'naqwi'

usi ka aasra bas aasra lage hai mujhe