na nind hai na KHwab hai na yaad hai na raat hai

na niiñd hai na ḳhvāb hai na yaad hai na raat hai

zamīñ na āsmān hai zamāñ na kā.enāt hai

ye jism-o-jāñ kā qāfila hai rāsta pe kaun se

na manziloñ kī aas hai na rahravoñ kā saath hai

umiid o aarzū ke rañg kyuuñ phīke lag rahe haiñ ab

kamī hai āb-o-gil meñ kuchh lahū meñ koī baat hai

hai un ke vāste tamām fat.h-o-kāmrāniyāñ

mire liye hamesha se jo hai to sirf maat hai

maiñ lahza lahza kaT ke gir rahā huuñ andhī khaa.ī meñ

ye zindagī kā rāsta nahīñ hai pul-sirāt hai

hai vasl apne-āp se firāq apne-āp se

nahīñ hai koī bhī yahāñ bas ek merī zaat hai

'māmūn' azal se tā-abad nahīñ hai koī raushnī

ḳhalā meñ duur duur tak bas ik aziim raat hai

na nind hai na KHwab hai na yaad hai na raat hai

zamin na aasman hai zaman na kaenat hai

ye jism-o-jaan ka qafila hai rasta pe kaun se

na manzilon ki aas hai na rahrawon ka sath hai

umid o aarzu ke rang kyun phike lag rahe hain ab

kami hai aab-o-gil mein kuchh lahu mein koi baat hai

hai un ke waste tamam fath-o-kaamraniyan

mere liye hamesha se jo hai to sirf mat hai

main lahza lahza kaT ke gir raha hun andhi khai mein

ye zindagi ka rasta nahin hai pul-siraat hai

hai wasl apne-ap se firaq apne-ap se

nahin hai koi bhi yahan bas ek meri zat hai

'mamun' azal se ta-abad nahin hai koi raushni

KHala mein dur dur tak bas ek azim raat hai