na phir rakkhenge teri rah mein pa hum

na phir rakkheñge terī rah meñ pā ham

ga.e-guzre haiñ āḳhir aise kyā ham

ḳhiñchegī kab vo teġh-e-nāz yārab

rahe haiñ der se sar ko jhukā ham

na jaanā ye ki kahte haiñ kise pyaar

raheñ be-lutfiyāñ hī yaañ to bāham

bane kyā ḳhāl-o-zulf-o-ḳhat se dekheñ

hue haiñ kitne ye kāfir farāham

maraz hī ishq kā be-Dol hai kuchh

bahut karte haiñ apnī sī davā ham

kahīñ paivand huuñ yārab zamīñ ke

phireñge us se yuuñ kab tak judā ham

havas thī ishq karne meñ va-lekin

bahut nādim hue dil ko lagā ham

kab aage koī martā thā kisī par

jahāñ meñ kar ga.e rasm-e-vafā ham

ta.āruf kyā rahā ahl-e-chaman se

hue ik umr ke pīchhe rihā ham

muā jis ke liye us ko na dekhā

na samjhe 'mīr' kā kuchh mudda.ā ham

na phir rakkhenge teri rah mein pa hum

gae-guzre hain aaKHir aise kya hum

KHinchegi kab wo tegh-e-naz yarab

rahe hain der se sar ko jhuka hum

na jaana ye ki kahte hain kise pyar

rahen be-lutfiyan hi yan to baham

bane kya KHal-o-zulf-o-KHat se dekhen

hue hain kitne ye kafir faraham

maraz hi ishq ka be-Dol hai kuchh

bahut karte hain apni si dawa hum

kahin paiwand hun yarab zamin ke

phirenge us se yun kab tak juda hum

hawas thi ishq karne mein wa-lekin

bahut nadim hue dil ko laga hum

kab aage koi marta tha kisi par

jahan mein kar gae rasm-e-wafa hum

taaruf kya raha ahl-e-chaman se

hue ek umr ke pichhe riha hum

mua jis ke liye us ko na dekha

na samjhe 'mir' ka kuchh muddaa hum