na pinhan raaz-e-gham ab hai na tha ai mehrban pahle

na pinhāñ rāz-e-ġham ab hai na thā ai mehrbāñ pahle

kisī par ab ayaañ hogā kisī par thā ayaañ pahle

asar hone ko to un par bhī hogā josh-e-vahshat kā

uḌeñgī mere hī dāman kī lekin dhajjiyāñ pahle

kashish dair-o-haram kī to asar-andāz hai yaksāñ

magar ye kah nahīñ saktā ki jā.ūñgā kahāñ pahle

chalā hai daur to baarī pe sāġhar mil hī jā.egā

bahut bejā hai ye kahnā yahāñ pahle vahāñ pahle

mujhe jab bhī koī Thokar lagī hai rāh-e-ulfat meñ

hamesha yaad aayā hai zamīñ se āsmāñ pahle

mirī ḳhāmoshī-e-paiham fasāna ban ga.ī varna

samajhtā hī na thā koī mohabbat kī zabāñ pahle

tumhāre naam se tāsīr is meñ ho ga.ī paidā

kabhī suntā na thā koī hamārī dāstāñ pahle

chaman ko chhoḌ kar jaanā zarā āsān ho jaatā

jalā detā agar sayyād merā āshiyāñ pahle

karam is ko samajhtā huuñ janāb-e-josh kā 'sāhir'

ġhazal meñ varna kab hotā thā ye husn-e-bayāñ pahle

na pinhan raaz-e-gham ab hai na tha ai mehrban pahle

kisi par ab ayan hoga kisi par tha ayan pahle

asar hone ko to un par bhi hoga josh-e-wahshat ka

uDengi mere hi daman ki lekin dhajjiyan pahle

kashish dair-o-haram ki to asar-andaz hai yaksan

magar ye kah nahin sakta ki jaunga kahan pahle

chala hai daur to bari pe saghar mil hi jaega

bahut beja hai ye kahna yahan pahle wahan pahle

mujhe jab bhi koi Thokar lagi hai rah-e-ulfat mein

hamesha yaad aaya hai zamin se aasman pahle

meri KHamoshi-e-paiham fasana ban gai warna

samajhta hi na tha koi mohabbat ki zaban pahle

tumhaare nam se tasir is mein ho gai paida

kabhi sunta na tha koi hamari dastan pahle

chaman ko chhoD kar jaana zara aasan ho jata

jala deta agar sayyaad mera aashiyan pahle

karam is ko samajhta hun janab-e-josh ka 'sahir'

ghazal mein warna kab hota tha ye husn-e-bayan pahle