na puchh ai ham-nashin hum kis liye lachaar baiThe hain

na pūchh ai ham-nashīñ ham kis liye lāchār baiThe haiñ

matā.a-e-jān-o-īmāñ kho chuke haiñ haar baiThe haiñ

kisī ke ġham meñ jān-e-zār se bezār baiThe haiñ

uThā hai dard sā pahlū meñ ham lāchār baiThe haiñ

ḳhabar bhī hai tumheñ uftādgān-e-kū-e-ulfat kī

hazāroñ chāhne vaale pas-e-dīvār baiThe haiñ

masīhā saf.h-e-hastī pe junūñ ko daaġh samjhā hai

vo tere chāhne vaale tire bīmār baiThe haiñ

nigāh-e-mast se apnī kaho tayyār ho jaa.e

ki dīvāne tumhāre aaj phir hushiyār baiThe haiñ

sazā kyā bārgāh-e-nāz se miltī hai dekheñge

gunah-gārān-e-ulfat der se tayyār baiThe haiñ

nigāh-e-lutf-e-sāqī dekhiye uThtī hai kis kis par

dar-e-mai-ḳhāna par ab saiñkaḌoñ mai-ḳhvār baiThe haiñ

huā 'nāmī' jo dil ruḳhsat to ummīd-e-vafā kis se

zamāne meñ bhalā aise kahīñ ġham-ḳhvār baiThe haiñ

na puchh ai ham-nashin hum kis liye lachaar baiThe hain

mataa-e-jaan-o-iman kho chuke hain haar baiThe hain

kisi ke gham mein jaan-e-zar se bezar baiThe hain

uTha hai dard sa pahlu mein hum lachaar baiThe hain

KHabar bhi hai tumhein uftadgan-e-ku-e-ulfat ki

hazaron chahne wale pas-e-diwar baiThe hain

masiha safh-e-hasti pe junun ko dagh samjha hai

wo tere chahne wale tere bimar baiThe hain

nigah-e-mast se apni kaho tayyar ho jae

ki diwane tumhaare aaj phir hushiyar baiThe hain

saza kya bargah-e-naz se milti hai dekhenge

gunah-garan-e-ulfat der se tayyar baiThe hain

nigah-e-lutf-e-saqi dekhiye uThti hai kis kis par

dar-e-mai-KHana par ab sainkaDon mai-KHwar baiThe hain

hua 'nami' jo dil ruKHsat to ummid-e-wafa kis se

zamane mein bhala aise kahin gham-KHwar baiThe hain