na puchh dil ke KHarabe se aur kya nikla

na pūchh dil ke ḳharābe se aur kyā niklā

baḌī talāsh ke ba.ad ek naqsh-e-pā niklā

ruke to chāñd bahut duur thā tasavvur se

chale to chaar hī qadmoñ kā fāslā niklā

ḳhirad ke phuul to murjhā ga.e bahāroñ meñ

junūñ kā zaḳhm ḳhizāñ meñ harā-bharā niklā

siyāh raat meñ lau de uThe lahū ke charāġh

rubāb-e-ishq se vo shola-e-navā niklā

safar-e-shabāb kā had-darja muḳhtasar thā magar

bahut tavīl sarāboñ kā silsila niklā

nigāh-e-nāz meñ mastī bhī hai taqaddus bhī

sharāb-ḳhāne kā mandir se rābta niklā

visāl-e-yār to qismat kī baat hai be-shak

ḳhayāl-e-yār bhī ham se bahut ḳhafā niklā

nigār-e-sher ne sola-siñgār jis meñ kiye

vo aa.ina mire ashkoñ kā ā.īnā niklā

kamāl-e-chashm-e-nazāra to dekhiye ai 'prem'

bayāz-e-jism kā har raaz ḳhushnumā niklā

na puchh dil ke KHarabe se aur kya nikla

baDi talash ke baad ek naqsh-e-pa nikla

ruke to chand bahut dur tha tasawwur se

chale to chaar hi qadmon ka fasla nikla

KHirad ke phul to murjha gae bahaaron mein

junun ka zaKHm KHizan mein hara-bhara nikla

siyah raat mein lau de uThe lahu ke charagh

rubab-e-ishq se wo shola-e-nawa nikla

safar-e-shabab ka had-darja muKHtasar tha magar

bahut tawil sarabon ka silsila nikla

nigah-e-naz mein masti bhi hai taqaddus bhi

sharab-KHane ka mandir se rabta nikla

visal-e-yar to qismat ki baat hai be-shak

KHayal-e-yar bhi hum se bahut KHafa nikla

nigar-e-sher ne sola-singar jis mein kiye

wo aaina mere ashkon ka aaina nikla

kamal-e-chashm-e-nazara to dekhiye ai 'prem'

bayaz-e-jism ka har raaz KHushnuma nikla