na puchh girya-e-KHun ka tere hai kya bais

na pūchh ''girya-e-ḳhūñ kā tire hai kyā bā.is''

sabab to aur nahīñ kuchh magar tirā baa.is

agarche shaiḳh hai piinā sharāb fel-e-shanī.a

pa kyā karūñ ki ka.ī din se thī huā baa.is

do-chand girya kī tabrīd se huī tab ishq

ziyādtī kā maraz kī hai yaañ davā baa.is

na jurm us kā hai sābit na kuchh mirī taqsīr

ḳhudā hī jaane ki ranjish kā kyā huā baa.is

rahā maiñ us se girafta ik umr tak lekin

kiyā jo ḳhuub ta.ammul to kuchh na thā baa.is

tarah us aab kī jo pairne se ho dirham

hue haiñ mere tashattut ke āshnā baa.is

kabhū khilā na dam-e-sard se ye dil 'qā.em'

agarche khilne kā ġhuncha ke hai sabā baa.is

na puchh girya-e-KHun ka tere hai kya bais

sabab to aur nahin kuchh magar tera bais

agarche shaiKH hai pina sharab fel-e-shania

pa kya karun ki kai din se thi hua bais

do-chand girya ki tabrid se hui tab ishq

ziyaadti ka maraz ki hai yan dawa bais

na jurm us ka hai sabit na kuchh meri taqsir

KHuda hi jaane ki ranjish ka kya hua bais

raha main us se girafta ek umr tak lekin

kiya jo KHub tammul to kuchh na tha bais

tarah us aab ki jo pairne se ho dirham

hue hain mere tashattut ke aashna bais

kabhu khila na dam-e-sard se ye dil 'qaem'

agarche khilne ka ghuncha ke hai saba bais