na puchh kaise ganwai hain ungliyan humne

na pūchh kaise gañvā.ī haiñ uñgliyāñ ham ne

ik aa.ine kī baTorī haiñ kirchiyāñ ham ne

hamārī tishna-labī kyā miTā.egā dariyā

samundaroñ kī uḌā dī haiñ dhajjiyāñ ham ne

khanaktī aa ga.iiñ kis tarah raat bistar par

chhupā ke dil meñ rakhī thiiñ ye chūḌiyāñ ham ne

is aa.ine meñ na ubhregā ab koī chehra

tumhāre ghar kī bujhā dī haiñ battiyāñ ham ne

bichhā ke dil ke ta'alluq pe barf kī chādar

na.e lihāf se kaaTī haiñ sardiyāñ ham ne

sabhī se haath milā.e gale sabhī se mile

sazā.eñ do ki bahut kī haiñ ġhalatiyāñ ham ne

ujāle māñgne sūraj se kaun jaa.e 'fahīm'

kisī ke paañv pe rakkhīñ na pagḌiyāñ ham ne

na puchh kaise ganwai hain ungliyan hum ne

ek aaine ki baTori hain kirchiyan hum ne

hamari tishna-labi kya miTaega dariya

samundaron ki uDa di hain dhajjiyan hum ne

khanakti aa gain kis tarah raat bistar par

chhupa ke dil mein rakhi thin ye chuDiyan hum ne

is aaine mein na ubhrega ab koi chehra

tumhaare ghar ki bujha di hain battiyan hum ne

bichha ke dil ke ta'alluq pe barf ki chadar

nae lihaf se kaTi hain sardiyan hum ne

sabhi se hath milae gale sabhi se mile

sazaen do ki bahut ki hain ghalatiyan hum ne

ujale mangne suraj se kaun jae 'fahim'

kisi ke panw pe rakkhin na pagDiyan hum ne