na puchh rabt hai kya uski dastan se mujhe

na pūchh rabt hai kyā us kī dāstāñ se mujhe

bichhaḌ gayā ki bichhaḌnā thā kārvāñ se mujhe

mire badan meñ koī bhar de barf ke TukḌe

ki aañch aatī hai rātoñ ko kahkashāñ se mujhe

kirāya-dār badalnā to us kā sheva thā

nikāl kar vo bahut ḳhush huā makāñ se mujhe

sadā.eñ jism kī dīvār paar kartī haiñ

koī pukār rahā hai magar kahāñ se mujhe

khaḌā khaḌā yūñhī sar par kahīñ na aan gire

lagā hī rahtā hai ye dar bhī āsmāñ se mujhe

ab us kī baarī hai to us se kaise muñh moḌūñ

kabhī to us ne bhī chāhā thā jism-o-jāñ se mujhe

mire irādoñ ko vo mujh se pūchh kar 'afsar'

do-chār kar gayā ik aur imtihāñ se mujhe

na puchh rabt hai kya us ki dastan se mujhe

bichhaD gaya ki bichhaDna tha karwan se mujhe

mere badan mein koi bhar de barf ke TukDe

ki aanch aati hai raaton ko kahkashan se mujhe

kiraya-dar badalna to us ka shewa tha

nikal kar wo bahut KHush hua makan se mujhe

sadaen jism ki diwar par karti hain

koi pukar raha hai magar kahan se mujhe

khaDa khaDa yunhi sar par kahin na aan gire

laga hi rahta hai ye dar bhi aasman se mujhe

ab us ki bari hai to us se kaise munh moDun

kabhi to us ne bhi chaha tha jism-o-jaan se mujhe

mere iradon ko wo mujh se puchh kar 'afsar'

do-chaar kar gaya ek aur imtihan se mujhe