na raste hue raushan na tirgi kam hai

na rāste hue raushan na tīrgī kam hai

ik aur sham.a jalāo ki raushnī kam hai

bas ik shu.ūr nahīñ dūsroñ ke dukh kā kuchh

vagarna ye nahīñ insāñ meñ āgahī kam hai

mai-e-aziyyat-e-daurāñ se hosh gum na kiye

ghaTā.eñ ho ga.iiñ halkī na ham ne pī kam hai

khiñche tumhārī taraf kis tarah se dil apnā

ki tum meñ ab bhī miyāñ shān-e-dilbarī kam hai

diloñ se ab bhī sharāre nikal to sakte haiñ

magar jo sho.ale uThātī vo aag hī kam hai

payām detī hai 'az.har' ye gardish-e-shab-o-roz

ki jald kar lo jo kar paao zindagī kam hai

na raste hue raushan na tirgi kam hai

ek aur shama jalao ki raushni kam hai

bas ek shuur nahin dusron ke dukh ka kuchh

wagarna ye nahin insan mein aagahi kam hai

mai-e-aziyyat-e-dauran se hosh gum na kiye

ghaTaen ho gain halki na hum ne pi kam hai

khinche tumhaari taraf kis tarah se dil apna

ki tum mein ab bhi miyan shan-e-dilbari kam hai

dilon se ab bhi sharare nikal to sakte hain

magar jo shoale uThati wo aag hi kam hai

payam deti hai 'azhar' ye gardish-e-shab-o-roz

ki jald kar lo jo kar pao zindagi kam hai