na rahguzar mein thi teri na kaenat mein thi

na rahguzar meñ thī terī na kā.enāt meñ thī

safar kī saarī sa.ūbat mirī hayāt meñ thī

na jaane kitne hī manzar the naqsh āñkhoñ meñ

hamārī soch kī manzil kisī kī zaat meñ thī

mujhe kahāñ se kahāñ le ga.ī zarā dekho

vo ek tanz kī ḳhushbū jo us kī baat meñ thī

hameñ jo phuul banāyā to dete ḳhushbū bhī

hamārī miTTī ai but-gar tumhāre haath meñ thī

abhī to sarhad-e-sāhil pe thā qadam us kā

ajiib sansanī lekin hamārī zaat meñ thī

mire badan kī harārat bhī le ga.ī 'paikar'

vo kaalī raat jo barsoñ se merī ghaat meñ thī

na rahguzar mein thi teri na kaenat mein thi

safar ki sari saubat meri hayat mein thi

na jaane kitne hi manzar the naqsh aankhon mein

hamari soch ki manzil kisi ki zat mein thi

mujhe kahan se kahan le gai zara dekho

wo ek tanz ki KHushbu jo us ki baat mein thi

hamein jo phul banaya to dete KHushbu bhi

hamari miTTi ai but-gar tumhaare hath mein thi

abhi to sarhad-e-sahil pe tha qadam us ka

ajib sansani lekin hamari zat mein thi

mere badan ki hararat bhi le gai 'paikar'

wo kali raat jo barson se meri ghat mein thi