na rok ai chaaragar is muztarib ko chiKH lene de

na rok ai chārāgar is muztarib ko chīḳh lene de

ye vo naala hai mar jaatā hai jis kā rokne vaalā

gayā vo vaqt jab terī vafāoñ kī tamanna thī

sitamgar ham ne andāz-e-tabī.at hī badal Daalā

ilāhī jab mujhe sachchī mohabbat tū ne baḳhshī hai

to paidā kar koī merī vafā kā dekhne vaalā

tumheñ samjhā rahā huuñ ho sake jab tak mujhe roko

jo niklī aah dil se kaun hai phir rokne vaalā

maiñ apne qatl kā ilzām apne sar pe le lūñgā

magar ye to batā do tum ne vo dāman to dho Daalā

'munīr' achchhā zarīya hai alā.eq qat.a karne kā

ajal kā aasrā goyā hai jaañ kā pālne vaalā

na rok ai chaaragar is muztarib ko chiKH lene de

ye wo nala hai mar jata hai jis ka rokne wala

gaya wo waqt jab teri wafaon ki tamanna thi

sitamgar hum ne andaz-e-tabiat hi badal Dala

ilahi jab mujhe sachchi mohabbat tu ne baKHshi hai

to paida kar koi meri wafa ka dekhne wala

tumhein samjha raha hun ho sake jab tak mujhe roko

jo nikli aah dil se kaun hai phir rokne wala

main apne qatl ka ilzam apne sar pe le lunga

magar ye to bata do tum ne wo daman to dho Dala

'munir' achchha zariya hai alaeq qata karne ka

ajal ka aasra goya hai jaan ka palne wala