na rudad apni kaha chahta hun

na rūdād apnī kahā chāhtā huuñ

na auroñ kī biitī sunā chāhtā huuñ

ḳhudā jaane kyoñ is se jī uTh gayā hai

ab is bazm se maiñ uThā chāhtā huuñ

na kar dil-jaloñ se guloñ kī hikāyat

bas itnā karam ai sabā chāhtā huuñ

na rahmat kar ai tund-e-bād-e-havādis

charāġh-e-sahar huuñ bujhā chāhtā huuñ

masarrat kī ghaḌiyāñ kahīñ bhūltī haiñ

magar maiñ unheñ bhūlnā chāhtā huuñ

mirā ġhuncha-e-dil ḳhudā hī khilā.e

nasīm-o-sabā kī duā chāhtā huuñ

adhūrā thā 'mohsin' mirā naqsh-e-hastī

banā bhī na thā aur miTā chāhtā huuñ

na rudad apni kaha chahta hun

na auron ki biti suna chahta hun

KHuda jaane kyon is se ji uTh gaya hai

ab is bazm se main uTha chahta hun

na kar dil-jalon se gulon ki hikayat

bas itna karam ai saba chahta hun

na rahmat kar ai tund-e-baad-e-hawadis

charagh-e-sahar hun bujha chahta hun

masarrat ki ghaDiyan kahin bhulti hain

magar main unhen bhulna chahta hun

mera ghuncha-e-dil KHuda hi khilae

nasim-o-saba ki dua chahta hun

adhura tha 'mohsin' mera naqsh-e-hasti

bana bhi na tha aur miTa chahta hun