na shikayat na gila yaad aaya

na shikāyat na gila yaad aaya

sheva-e-ahl-e-vafā yaad aaya

allah allāh mirā husn-e-nazar

but ko dekhe se ḳhudā yaad aaya

gum huā jaatā huuñ baiThe baiThe

jalva-e-hosh-rubā yaad aaya

us ke aane se ḳhudā ko bhūlā

vo na aaya to ḳhudā yaad aaya

bhuul baiThā huuñ maiñ apne ghar ko

kyoñ tire ghar kā patā yaad aaya

is tarah Duubī hai dil kī kashtī

nā-ḳhudā ko bhī ḳhudā yaad aaya

shiddat-e-ġham se farāġhat na huī

mujh ko hañsnā jo zarā yaad aaya

band hotī nahīñ tarsī āñkheñ

haa.e kyā vaqt-e-qazā yaad aaya

kū-e-qātil ko chale ho 'navvāb'

baiThe baiThe tumheñ kyā yaad aaya

na shikayat na gila yaad aaya

shewa-e-ahl-e-wafa yaad aaya

allah allah mera husn-e-nazar

but ko dekhe se KHuda yaad aaya

gum hua jata hun baiThe baiThe

jalwa-e-hosh-ruba yaad aaya

us ke aane se KHuda ko bhula

wo na aaya to KHuda yaad aaya

bhul baiTha hun main apne ghar ko

kyon tere ghar ka pata yaad aaya

is tarah Dubi hai dil ki kashti

na-KHuda ko bhi KHuda yaad aaya

shiddat-e-gham se faraghat na hui

mujh ko hansna jo zara yaad aaya

band hoti nahin tarsi aankhen

hae kya waqt-e-qaza yaad aaya

ku-e-qatil ko chale ho 'nawwab'

baiThe baiThe tumhein kya yaad aaya