na sirf dil hi gaya dil ka muddaa bhi gaya

na sirf dil hī gayā dil kā mudda.ā bhī gayā

vo kyā ga.e kabhī milne kā silsila bhī gayā

maiñ us ko jaane se rokūñ to kis tarah rokūñ

maiñ sochtī hī rahī aur vo chalā bhī gayā

vo aur din the ki jab zindagī meñ sab kuchh thā

ab us ke ba.ad to jiine kā hausla bhī gayā

husūl-e-zar kī havas us ko le ga.ī pardes

sukūn-e-dil kī vo daulat magar luTā bhī gayā

havā kā jhoñkā jo shāḳhoñ ko gudgudātā thā

vo hañste phūloñ ko chhū kar unheñ rulā bhī gayā

vo shahr-e-sañg meñ pahuñchā to ho gayā patthar

ab us se milne kā pur-kaif silsila bhī gayā

koī batā.e to 'nasrīn' ham kahāñ jaa.eñ

use bhī pā na sake haath se ḳhudā bhī gayā

na sirf dil hi gaya dil ka muddaa bhi gaya

wo kya gae kabhi milne ka silsila bhi gaya

main us ko jaane se rokun to kis tarah rokun

main sochti hi rahi aur wo chala bhi gaya

wo aur din the ki jab zindagi mein sab kuchh tha

ab us ke baad to jine ka hausla bhi gaya

husul-e-zar ki hawas us ko le gai pardes

sukun-e-dil ki wo daulat magar luTa bhi gaya

hawa ka jhonka jo shaKHon ko gudgudata tha

wo hanste phulon ko chhu kar unhen rula bhi gaya

wo shahr-e-sang mein pahuncha to ho gaya patthar

ab us se milne ka pur-kaif silsila bhi gaya

koi batae to 'nasrin' hum kahan jaen

use bhi pa na sake hath se KHuda bhi gaya