na sirf itna ki tund-o-tez dhaara dekhta hun main

na sirf itnā ki tund-o-tez dhārā dekhtā huuñ maiñ

jo kaTtā jā rahā hai vo kinārā dekhtā huuñ maiñ

pahuñch kar sarhad-e-irfāñ pe āñkheñ bujhne lagtī haiñ

ye kis be-e'tibārī kā nazāra dekhtā huuñ maiñ

sabhī nazreñ to haiñ bujhte charāġhoñ tak jamī lekin

bisāt-e-anjuman ko pāra-pāra dekhtā huuñ maiñ

bhaḌak uThte haiñ jab sho.ale to hairānī nahīñ hotī

fazā kī god meñ paltā sharāra dekhtā huuñ maiñ

manāzir kab badalte haiñ jagah tabdīl hone se

vahī ek khel hai jis ko dobāra dekhtā huuñ maiñ

vahāñ se kyoñ mirī sochoñ pe tum ilzām dharte ho

yahāñ aa kar to dekho kyā nazāra dekhtā huuñ maiñ

na sirf itna ki tund-o-tez dhaara dekhta hun main

jo kaTta ja raha hai wo kinara dekhta hun main

pahunch kar sarhad-e-irfan pe aankhen bujhne lagti hain

ye kis be-e'tibari ka nazara dekhta hun main

sabhi nazren to hain bujhte charaghon tak jami lekin

bisat-e-anjuman ko para-para dekhta hun main

bhaDak uThte hain jab shoale to hairani nahin hoti

faza ki god mein palta sharara dekhta hun main

manazir kab badalte hain jagah tabdil hone se

wahi ek khel hai jis ko dobara dekhta hun main

wahan se kyon meri sochon pe tum ilzam dharte ho

yahan aa kar to dekho kya nazara dekhta hun main