na sirf ye ki sabhi gul-badan darida rahe

na sirf ye ki sabhī gul-badan darīda rahe

hamāre haal pe patthar bhī ābdīda rahe

usī zamāne meñ fan par nikhār bhī aayā

vo jis zamāne meñ ham se bahut kashīda rahe

unhīñ ne vaqt ke chehre ko tābnākī dī

jo log vaqt ke hāthoñ sitam-rasīda rahe

ham ek qissa-e-andoh-o-yās the lekin

samā.atoñ ke nagar meñ bhī nā-shunīda rahe

kuchh is tarah se rahā huuñ maiñ terī mahfil meñ

ki jaise mahñgī kitāboñ meñ ik jarīda rahe

har ek daur meñ sach bolte rahe ham log

har ek daur meñ ham log sar-burīda rahe

koī bhī zahr unheñ kyā halāk kar paatā

jo terī bazm meñ tere karam-gazīda rahe

chaman ko baḳhsh dī ham ne qabā-e-gul 'shā.ir'

ba-faiz-e-dast-e-junūñ ham qabā-darīda rahe

na sirf ye ki sabhi gul-badan darida rahe

hamare haal pe patthar bhi aabdida rahe

usi zamane mein fan par nikhaar bhi aaya

wo jis zamane mein hum se bahut kashida rahe

unhin ne waqt ke chehre ko tabnaki di

jo log waqt ke hathon sitam-rasida rahe

hum ek qissa-e-andoh-o-yas the lekin

samaaton ke nagar mein bhi na-shunida rahe

kuchh is tarah se raha hun main teri mahfil mein

ki jaise mahngi kitabon mein ek jarida rahe

har ek daur mein sach bolte rahe hum log

har ek daur mein hum log sar-burida rahe

koi bhi zahr unhen kya halak kar pata

jo teri bazm mein tere karam-gazida rahe

chaman ko baKHsh di hum ne qaba-e-gul 'shair'

ba-faiz-e-dast-e-junun hum qaba-darida rahe