na sochen ahl-e-KHirad mujhko aazmane ko

na socheñ ahl-e-ḳhirad mujh ko āzmāne ko

maiñ jāntā huuñ bahut aql ke fasāne ko

nahīñ qafas se nikalne kī aarzū sayyād

dikhā de ek nazar mere āshiyāne ko

asiir kar ke qafas meñ mujhe ye hairat hai

vo kah rahe haiñ mujhī se chaman bachāne ko

sulūk ahl-e-chaman se ye bāġhbāñ ne kiyā

qafas samajhne lage haiñ sab āshiyāne ko

batāo tum ko ye kyā ho gayā hai ahl-e-chaman

jalā rahe ho jo ḳhud apne āshiyāne ko

jafā-o-zulm ke is tund tez tūfāñ meñ

vo mujh se kahte haiñ sham-e-vafā jalāne ko

girā rahe haiñ musalsal vo bijliyāñ 'dānish'

batāo kaise bachāoge āshiyāne ko

na sochen ahl-e-KHirad mujh ko aazmane ko

main jaanta hun bahut aql ke fasane ko

nahin qafas se nikalne ki aarzu sayyaad

dikha de ek nazar mere aashiyane ko

asir kar ke qafas mein mujhe ye hairat hai

wo kah rahe hain mujhi se chaman bachane ko

suluk ahl-e-chaman se ye baghban ne kiya

qafas samajhne lage hain sab aashiyane ko

batao tum ko ye kya ho gaya hai ahl-e-chaman

jala rahe ho jo KHud apne aashiyane ko

jafa-o-zulm ke is tund tez tufan mein

wo mujh se kahte hain sham-e-wafa jalane ko

gira rahe hain musalsal wo bijliyan 'danish'

batao kaise bachaoge aashiyane ko