na tajalliyan na tasalliyan na salam hai na kalam hai

na tajalliyāñ na tasalliyāñ na salām hai na kalām hai

tirī jalva-gāh-e-ḳhayāl meñ bhī sukūt hī kā payām hai

abhī husn mahv-e-ḳhirām hai abhī shoḳh jalva-e-ām hai

kabhī ḳhalvatoñ meñ bhī raam hai ki taḳhayyulāt kā daam hai

na vo ārzūeñ zabāñ zabāñ na vo hasrateñ haiñ nazar nazar

tirī anjuman na vo anjuman na vo shauq hī kā maqām hai

na vo tūr-e-nāz kī bijliyāñ na kalīm-e-ishq kī shoḳhiyāñ

na vo raunaqeñ na vo ishrateñ na vo sub.h hai na vo shaam hai

jo sharāb-e-husn-o-jamāl meñ bhī haiñ bul-havas kī milāvaTeñ

dil-e-mai-parast hai ḳhūñ-fishāñ ki ye mai-kade kā nizām hai

dam-e-kā.enāt fuġhāñ-fuġhāñ ġham-e-mumkināt hai jāñ-sitāñ

ye tasavvurāt dhuāñ-dhuāñ ki 'adam vujūd kā naam hai

hai nishān-e-zaḳhm subū-subū yahāñ sāġharoñ meñ lahū-lahū

ye bukā ye naala ye hichkiyāñ ye fuġhān-e-shīsha-o-jām hai

mirī aah raunaq-e-anjuman hai sadā-e-dard suḳhan-suḳhan

tirī pardagī kā ye bāñkpan kahāñ jalva hai kahāñ baam hai

hai talāsh-e-husn makāñ-makāñ vahī justujū hai zamāñ-zamāñ

ye fareb 'aḳhtar'-e-ḳhush-gumāñ dil-e-mubtalā kā hī kaam hai

na tajalliyan na tasalliyan na salam hai na kalam hai

teri jalwa-gah-e-KHayal mein bhi sukut hi ka payam hai

abhi husn mahw-e-KHiram hai abhi shoKH jalwa-e-am hai

kabhi KHalwaton mein bhi ram hai ki taKHayyulat ka dam hai

na wo aarzuen zaban zaban na wo hasraten hain nazar nazar

teri anjuman na wo anjuman na wo shauq hi ka maqam hai

na wo tur-e-naz ki bijliyan na kalim-e-ishq ki shoKHiyan

na wo raunaqen na wo ishraten na wo subh hai na wo sham hai

jo sharab-e-husn-o-jamal mein bhi hain bul-hawas ki milawaTen

dil-e-mai-parast hai KHun-fishan ki ye mai-kade ka nizam hai

dam-e-kaenat fughan-fughan gham-e-mumkinat hai jaan-sitan

ye tasawwuraat dhuan-dhuan ki 'adam wujud ka nam hai

hai nishan-e-zaKHm subu-subu yahan sagharon mein lahu-lahu

ye buka ye nala ye hichkiyan ye fughan-e-shisha-o-jam hai

meri aah raunaq-e-anjuman hai sada-e-dard suKHan-suKHan

teri pardagi ka ye bankpan kahan jalwa hai kahan baam hai

hai talash-e-husn makan-makan wahi justuju hai zaman-zaman

ye fareb 'aKHtar'-e-KHush-guman dil-e-mubtala ka hi kaam hai