na thi hamari KHata etiraf kya karte

na thī hamārī ḳhatā e'tirāf kyā karte

the be-gunāh to munsif mu'āf kyā karte

koī na thā jo yahāñ apnā jā.eza letā

har aa.ine se hamīñ gard saaf kyā karte

na guftugū kā salīqa na kaaT lahje meñ

samā'atoñ meñ suḳhanvar shigāf kyā karte

ḳhalā-navard the is daur meñ ham ahl-e-junūñ

hamāre gird bagūle tavāf kyā karte

sipurd-e-tāq the har ghar meñ shāhkār-e-hayāt

hifāzat un kī akele ġhilāf kyā karte

sabhī the ahl-e-nazar ik hisār tak mahdūd

utarte tah meñ to phir inkishāf kyā karte

mirī tarah jinheñ mā'nī kī justujū bhī nahīñ

hisār-e-lafz meñ vo ai'takāf kyā karte

aziyyateñ jinheñ detī hoñ rāhatoñ kī navīd

tire sitam se bhī vo iḳhtilāf kyā karte

vo apnī fikr meñ zinda hai harf harf 'zafar'

harīf-e-fan bhī kuchh us ke ḳhilāf kyā karte

na thi hamari KHata e'tiraf kya karte

the be-gunah to munsif mu'af kya karte

koi na tha jo yahan apna jaeza leta

har aaine se hamin gard saf kya karte

na guftugu ka saliqa na kaT lahje mein

sama'aton mein suKHanwar shigaf kya karte

KHala-naward the is daur mein hum ahl-e-junun

hamare gird bagule tawaf kya karte

sipurd-e-taq the har ghar mein shahkar-e-hayat

hifazat un ki akele ghilaf kya karte

sabhi the ahl-e-nazar ek hisar tak mahdud

utarte tah mein to phir inkishaf kya karte

meri tarah jinhen ma'ni ki justuju bhi nahin

hisar-e-lafz mein wo ai'takaf kya karte

aziyyaten jinhen deti hon rahaton ki nawid

tere sitam se bhi wo iKHtilaf kya karte

wo apni fikr mein zinda hai harf harf 'zafar'

harif-e-fan bhi kuchh us ke KHilaf kya karte