na to justuju-e-dawa-e-dil na to chaaragar ki talash hai

na to justujū-e-davā-e-dil na to chārāgar kī talāsh hai

jo mazāq-e-ġham se ho āshnā mujhe us nazar kī talāsh hai

maiñ huuñ rāh-rau maiñ huuñ kārvāñ maiñ huuñ rāhbar maiñ huuñ rāhzan

mire pech-o-ḳham jo samajh sake mujhe us ḳhizar kī talāsh hai

maiñ ayaañ bhī huuñ maiñ nihāñ bhī huuñ maiñ kahāñ nahīñ maiñ kahīñ nahīñ

jo batā.e mujh ko mirā patā mujhe us ḳhabar kī talāsh hai

hai ḳhirad se bhī mujhe vāsta haiñ junūñ se bhī mujhe nisbateñ

jo imām-e-mastī-o-hosh ho usī dīda-var kī talāsh hai

maiñ asīr-e-zauq-e-ḳhirām huuñ kabhī sub.h huuñ kabhī shaam huuñ

jahāñ manziloñ kā guzar na ho usī rahguzar kī talāsh hai

haiñ zamīñ pe mere qadam magar mirī āsmān pe hai nazar

maiñ huuñ tā.ir-e-falak-āshiyāñ mujhe bāl-o-par kī talāsh hai

milī dair-o-ka.aba kī sar-zamīñ ye jabīñ kahīñ bhī jhukī nahīñ

maiñ 'shafīq' tujh ko batā.ūñ kyā mujhe kis ke dar kī talāsh hai

na to justuju-e-dawa-e-dil na to chaaragar ki talash hai

jo mazaq-e-gham se ho aashna mujhe us nazar ki talash hai

main hun rah-rau main hun karwan main hun rahbar main hun rahzan

mere pech-o-KHam jo samajh sake mujhe us KHizar ki talash hai

main ayan bhi hun main nihan bhi hun main kahan nahin main kahin nahin

jo batae mujh ko mera pata mujhe us KHabar ki talash hai

hai KHirad se bhi mujhe wasta hain junun se bhi mujhe nisbaten

jo imam-e-masti-o-hosh ho usi dida-war ki talash hai

main asir-e-zauq-e-KHiram hun kabhi subh hun kabhi sham hun

jahan manzilon ka guzar na ho usi rahguzar ki talash hai

hain zamin pe mere qadam magar meri aasman pe hai nazar

main hun tair-e-falak-ashiyan mujhe baal-o-par ki talash hai

mili dair-o-kaba ki sar-zamin ye jabin kahin bhi jhuki nahin

main 'shafiq' tujh ko bataun kya mujhe kis ke dar ki talash hai