na unki tarjumani se na un ko darmiyan kar ke

na un kī tarjumānī se na un ko darmiyāñ kar ke

diloñ kā faisla hotā hai āñkhoñ ko zabāñ kar ke

hamāre ġham hamāre dil kī pākīza amānat haiñ

ḳhayānat ham se ho saktī nahīñ āh-o-fuġhāñ kar ke

nigāhoñ meñ samā.e dil meñ utre ruuh tak pahuñche

ishāra-bāziyāñ dil-reziyāñ sargoshiyāñ kar ke

tum apnī saltanat pe is qadar nāzāñ ho aur ham ne

bhulā diiñ shāhiyāñ sultāniyāñ sardāriyāñ kar ke

vo kho baiThe ba-āsānī vaqār-e-zindagī apnā

himāqat-ḳheziyāñ be-aqliyāñ nādāniyāñ kar ke

ḳhudā jaane mire ahbāb kī kyā maqsadiyyat hai

ye fitna-ḳheziyāñ bezāriyāñ be-mehriyāñ kar ke

jahāñ ko phir usī husn-e-tilismāna kī hājat hai

dikhā de ek pal meñ jo ḳhirad kī dhajjiyāñ kar ke

na un ki tarjumani se na un ko darmiyan kar ke

dilon ka faisla hota hai aankhon ko zaban kar ke

hamare gham hamare dil ki pakiza amanat hain

KHayanat hum se ho sakti nahin aah-o-fughan kar ke

nigahon mein samae dil mein utre ruh tak pahunche

ishaara-baziyan dil-reziyan sargoshiyan kar ke

tum apni saltanat pe is qadar nazan ho aur hum ne

bhula din shahiyan sultaniyan sardariyan kar ke

wo kho baiThe ba-asani waqar-e-zindagi apna

himaqat-KHeziyan be-aqliyan nadaniyan kar ke

KHuda jaane mere ahbab ki kya maqsadiyyat hai

ye fitna-KHeziyan bezariyan be-mehriyan kar ke

jahan ko phir usi husn-e-tilismana ki hajat hai

dikha de ek pal mein jo KHirad ki dhajjiyan kar ke