na usko bhul pae hain na humne yaad rakkha hai

na us ko bhuul paa.e haiñ na ham ne yaad rakkhā hai

dil-e-barbād ko is tarha se ābād rakkhā hai

jhamele aur bhī suljhāne vaale haiñ ka.ī pahle

aur us ke vasl kī ḳhvāhish ko sab se baad rakkhā hai

rukā rahtā hai chāroñ samt ashk o aah kā mausam

ravāñ har lahza kārobār-e-abr-o-bād rakkhā hai

phir is kī kāmyābī kā koī imkān hī kyā ho

agar us shoḳh par daavā hī be-buniyād rakkhā hai

ḳhizāñ ke ḳhushk patte jis meñ din-bhar khaḌkhaḌāte haiñ

isī mausam kā naam ab ke bahār-ījād rakkhā hai

ye kyā kam hai ki ham haiñ to sahī fahrist meñ us kī

bhale nā-shād rakkhā hai ki ham ko shaad rakkhā hai

jise lafz-e-mohabbat ke ma.ānī tak nahīñ aate

use apne liye ham ne yahāñ ustād rakkhā hai

javāb apne ko chāhe jo bhī vo malbūs pahnā.e

savāl is dil ne us ke aage mādar-zād rakkhā hai

'zafar' itnā hī kaafī hai jo vo raazī rahe ham par

kamar apnī pe koī bojh ham ne laad rakkhā hai

na us ko bhul pae hain na hum ne yaad rakkha hai

dil-e-barbaad ko is tarha se aabaad rakkha hai

jhamele aur bhi suljhane wale hain kai pahle

aur us ke wasl ki KHwahish ko sab se baad rakkha hai

ruka rahta hai chaaron samt ashk o aah ka mausam

rawan har lahza karobar-e-abr-o-baad rakkha hai

phir is ki kaamyabi ka koi imkan hi kya ho

agar us shoKH par dawa hi be-buniyaad rakkha hai

KHizan ke KHushk patte jis mein din-bhar khaDkhaDate hain

isi mausam ka nam ab ke bahaar-ijad rakkha hai

ye kya kam hai ki hum hain to sahi fahrist mein us ki

bhale na-shad rakkha hai ki hum ko shad rakkha hai

jise lafz-e-mohabbat ke maani tak nahin aate

use apne liye hum ne yahan ustad rakkha hai

jawab apne ko chahe jo bhi wo malbus pahnae

sawal is dil ne us ke aage madar-zad rakkha hai

'zafar' itna hi kafi hai jo wo raazi rahe hum par

kamar apni pe koi bojh hum ne lad rakkha hai