na usne haal hi puchha na koi baat hui

na us ne haal hī pūchhā na koī baat huī

kahūñ maiñ kaise ki haañ un se mulāqāt huī

laboñ se mere jo niklī to ik sadā hī rahī

diloñ meñ sab ke jo utrī vo baat baat huī

jo terī diid se raushan huī sahar hai vahī

jo tere pahlū meñ guzrī vo raat raat huī

ye khel dekhe mohabbat ke khel meñ ham ne

na jiit jiit rahī aur na maat maat huī

hisār-e-zāt meñ thā 'imtiyāz' qaid magar

jo apne ḳhol se niklā to zaat zaat huī

na us ne haal hi puchha na koi baat hui

kahun main kaise ki han un se mulaqat hui

labon se mere jo nikli to ek sada hi rahi

dilon mein sab ke jo utri wo baat baat hui

jo teri did se raushan hui sahar hai wahi

jo tere pahlu mein guzri wo raat raat hui

ye khel dekhe mohabbat ke khel mein hum ne

na jit jit rahi aur na mat mat hui

hisar-e-zat mein tha 'imtiyaz' qaid magar

jo apne KHol se nikla to zat zat hui