na wo anjum hai na wo shams-o-qamar jaisa hai

na vo anjum hai na vo shams-o-qamar jaisā hai

āsmāñ us ke liye rāhguzar jaisā hai

chuur ho jā.egā har qatra-e-shabnam kā ġhurūr

chand lamhoñ ke liye jo ki guhar jaisā hai

ab nigāheñ mirī ruktī nahīñ us ke ruḳh par

mere mahbūb kā har 'aks bhañvar jaisā hai

qais rahtā hai yahāñ hiir bhī lailā bhī yahāñ

dil mirā ek mohabbat ke nagar jaisā hai

is salīqe se vo chaltā hai ki Thokar na lage

hai to nā-bīnā magar ahl-e-nazar jaisā hai

ab sabhī amn kī karte haiñ du'ā.eñ 'ḳhushtar'

yā'nī ehsās udhar kā bhī idhar jaisā hai

na wo anjum hai na wo shams-o-qamar jaisa hai

aasman us ke liye rahguzar jaisa hai

chur ho jaega har qatra-e-shabnam ka ghurur

chand lamhon ke liye jo ki guhar jaisa hai

ab nigahen meri rukti nahin us ke ruKH par

mere mahbub ka har 'aks bhanwar jaisa hai

qais rahta hai yahan hir bhi laila bhi yahan

dil mera ek mohabbat ke nagar jaisa hai

is saliqe se wo chalta hai ki Thokar na lage

hai to na-bina magar ahl-e-nazar jaisa hai

ab sabhi amn ki karte hain du'aen 'KHushtar'

ya'ni ehsas udhar ka bhi idhar jaisa hai