na wo dard hai na wo ranj hai na hujum zulmat-e-sham hai

na vo dard hai na vo rañj hai na hujūm zulmat-e-shām hai

mire ḳhushk hoñToñ pe yak-ba-yak jo chamak uThā tirā naam hai

kabhī kahkashāñ se guzar ga.e kabhī bazm-e-gul meñ utar ga.e

jo samajh ga.e to Thahar ga.e tirā dar hī apnā maqām hai

mire ġham haiñ kitne ajiib se vo milā kahāñ hai nasīb se

yahāñ qurb kī mujhe aarzū vahāñ duur hī se salām hai

jo chhupā ke pyāsoñ se maiñ piyūñ jo kisī ke haath se chhīn luuñ

to vo pyaas mujh se gunāh hai to vo jaam mujh pe harām hai

suno sar-phiro mire hāsīdo mirī zindagī kā hai raaz kyā

mirā sar kahīñ bhī jhuke to kyuuñ mirā dil kisī kā ġhulām hai

hameñ thī ḳhabar ye to peshtar ki hai āstīñ meñ chhupī chhurī

mile phir gale yahī soch kar chalo lab pe is ke to raam hai

maiñ vahī huuñ 'ḳhālid'-e-nā-rasā mujhe jāntā hai ye mai-kada

mirā jaam jaam meñ aks hai mirā buuñd buuñd meñ naam hai

na wo dard hai na wo ranj hai na hujum zulmat-e-sham hai

mere KHushk honTon pe yak-ba-yak jo chamak uTha tera nam hai

kabhi kahkashan se guzar gae kabhi bazm-e-gul mein utar gae

jo samajh gae to Thahar gae tera dar hi apna maqam hai

mere gham hain kitne ajib se wo mila kahan hai nasib se

yahan qurb ki mujhe aarzu wahan dur hi se salam hai

jo chhupa ke pyason se main piyun jo kisi ke hath se chhin lun

to wo pyas mujh se gunah hai to wo jam mujh pe haram hai

suno sar-phiro mere hasido meri zindagi ka hai raaz kya

mera sar kahin bhi jhuke to kyun mera dil kisi ka ghulam hai

hamein thi KHabar ye to peshtar ki hai aastin mein chhupi chhuri

mile phir gale yahi soch kar chalo lab pe is ke to ram hai

main wahi hun 'KHalid'-e-na-rasa mujhe jaanta hai ye mai-kada

mera jam jam mein aks hai mera bund bund mein nam hai