na wo mai-farosh hote na main baada-KHwar hota

na vo mai-farosh hote na maiñ bāda-ḳhvār hotā

na vo mast-e-nāz hote na mujhe ḳhumār hotā

mujhe tā-hayāt rahtā tirā intizār paiham

agar apnī zindagī par koī e'tibār hotā

ġham-e-intizār kyā hai ye rumūz tujh pe khulte

tujhe bhī kisī kā zālim agar intizār hotā

unheñ is qadar na hotā ye ġhurūr-e-be-niyāzī

mujhe apne jazb-e-dil par agar iḳhtiyār hotā

mire shauq-e-be-karāñ kī koī intihā na hotī

mire halqa-e-junūñ kā na kahīñ hisār hotā

inhīñ hasratoñ meñ guzre mirī zindagī ke lamhe

koī dil-navāz hotā koī ġham-gusār hotā

yahī aarzū hai yā-rab mire jazba-e-darūñ kī

mirī zaat par madār-e-ġham-e-rozgār hotā

koī jalva-rez hotā mirī bazm-e-ārzū meñ

mire dil kī anjuman meñ koī naġhma-bār hotā

na wo mai-farosh hote na main baada-KHwar hota

na wo mast-e-naz hote na mujhe KHumar hota

mujhe ta-hayat rahta tera intizar paiham

agar apni zindagi par koi e'tibar hota

gham-e-intizar kya hai ye rumuz tujh pe khulte

tujhe bhi kisi ka zalim agar intizar hota

unhen is qadar na hota ye ghurur-e-be-niyazi

mujhe apne jazb-e-dil par agar iKHtiyar hota

mere shauq-e-be-karan ki koi intiha na hoti

mere halqa-e-junun ka na kahin hisar hota

inhin hasraton mein guzre meri zindagi ke lamhe

koi dil-nawaz hota koi gham-gusar hota

yahi aarzu hai ya-rab mere jazba-e-darun ki

meri zat par madar-e-gham-e-rozgar hota

koi jalwa-rez hota meri bazm-e-arzu mein

mere dil ki anjuman mein koi naghma-bar hota