na zikr-e-gesu-e-pechan na zulf barham hai

na zikr-e-gesu-e-pechāñ nā zulf barham hai

hamāre ġham kā fasāna bhī kitnā mub.ham hai

hamārā faqr azal se ḳhudī kā mahram hai

hamārā boriyā kab taḳht-e-shāh se kam hai

diloñ kā haal ḳhudā-e-karīm hī jaane

libās-e-zohad meñ nāmūs-e-ibn-e-ādam hai

lahū safed huā kis qadar zamāne kā

jo ro.e ḳhuun ke aañsū kahā ki shabnam hai

kalī kalī pe hai rūdād-e-gulsitāñ likkhī

khile to eid hai murjhā ga.e to mātam hai

hisār-e-zabt pa pahre biThā.e haiñ maiñ ne

samajh rahā hai zamāna ki aañkh pur-nam hai

'zuhūr' sāya-e-ustād-e-mohtaram na sahī

ġhazal kahī jo ye faiz o jigar se kyā kam hai

na zikr-e-gesu-e-pechan na zulf barham hai

hamare gham ka fasana bhi kitna mubham hai

hamara faqr azal se KHudi ka mahram hai

hamara boriya kab taKHt-e-shah se kam hai

dilon ka haal KHuda-e-karim hi jaane

libas-e-zohad mein namus-e-ibn-e-adam hai

lahu safed hua kis qadar zamane ka

jo roe KHun ke aansu kaha ki shabnam hai

kali kali pe hai rudad-e-gulsitan likkhi

khile to eid hai murjha gae to matam hai

hisar-e-zabt pa pahre biThae hain main ne

samajh raha hai zamana ki aankh pur-nam hai

'zuhur' saya-e-ustad-e-mohtaram na sahi

ghazal kahi jo ye faiz o jigar se kya kam hai