na zindagi ko haqiqat na KHwab likhna hai

na zindagī ko haqīqat na ḳhvāb likhnā hai

vajūd-e-zīst ko apne sarāb likhnā hai

nazar kā apnī mujhe intiḳhāb likhnā hai

tujhī ko chāñd tujhī ko gulāb likhnā hai

ravāñ ho kārvāñ chāhe zavāl kī jānib

mufakkiroñ ko magar inqalāb likhnā hai

ye husn-o-ishq vafā-o-visāl kā mausam

tumhīñ batāo ki kis ko ḳharāb likhnā hai

fasād jurm adāvat ġhurūr ayyārī

zarā sī umr meñ kitnā hisāb likhnā hai

vo baat likhnā jo zaḳhm-e-jigar kī mūjib ho

agar ḳhatoñ kā hamāre javāb likhnā hai

suḳhnavaroñ ne to likkhā habāb hastī ko

hameñ hayāt ko apnī sarāb likhnā hai

na zindagi ko haqiqat na KHwab likhna hai

wajud-e-zist ko apne sarab likhna hai

nazar ka apni mujhe intiKHab likhna hai

tujhi ko chand tujhi ko gulab likhna hai

rawan ho karwan chahe zawal ki jaanib

mufakkiron ko magar inqalab likhna hai

ye husn-o-ishq wafa-o-visal ka mausam

tumhin batao ki kis ko KHarab likhna hai

fasad jurm adawat ghurur ayyari

zara si umr mein kitna hisab likhna hai

wo baat likhna jo zaKHm-e-jigar ki mujib ho

agar KHaton ka hamare jawab likhna hai

suKHnawaron ne to likkha habab hasti ko

hamein hayat ko apni sarab likhna hai