na-fahm kahun main use aisa bhi nahin hai

nā-fahm kahūñ maiñ use aisā bhī nahīñ hai

kyā shai hai mohabbat vo samajhtā bhī nahīñ hai

maanā ki bahut rābta-e-ishq hai nāzuk

ham toḌ sakeñ jis ko vo rishtā bhī nahīñ hai

har shai se judā hai dil-e-barbād kī fitrat

jab tak na ho barbād sañvartā bhī nahīñ hai

ummīd hai vābasta mirī abr-e-karam se

aur abr-e-karam hai ki barastā bhī nahīñ hai

āsāñ nahīñ is rāh-e-mohabbat se guzarnā

jis raah meñ halkā sā ujālā bhī nahīñ hai

har vaqt gulistāñ pe ḳhizāñ kī haiñ nigāheñ

khulte hue phūloñ kā bharosā bhī nahīñ hai

hamdardī ahbāb kā kyā zikr hai 'shā.ir'

is samt koī dekhne vaalā bhī nahīñ hai

na-fahm kahun main use aisa bhi nahin hai

kya shai hai mohabbat wo samajhta bhi nahin hai

mana ki bahut rabta-e-ishq hai nazuk

hum toD saken jis ko wo rishta bhi nahin hai

har shai se juda hai dil-e-barbaad ki fitrat

jab tak na ho barbaad sanwarta bhi nahin hai

ummid hai wabasta meri abr-e-karam se

aur abr-e-karam hai ki barasta bhi nahin hai

aasan nahin is rah-e-mohabbat se guzarna

jis rah mein halka sa ujala bhi nahin hai

har waqt gulistan pe KHizan ki hain nigahen

khulte hue phulon ka bharosa bhi nahin hai

hamdardi ahbab ka kya zikr hai 'shair'

is samt koi dekhne wala bhi nahin hai