na-KHush gadai se na wo shahi se KHush hue

nā-ḳhush gadā.ī se na vo shāhī se ḳhush hue

mazlūm zālimoñ kī tabāhī se ḳhush hue

sad-manzila vo qasr-e-anā Dher ho gayā

ahbāb pul-sirāt ke raahī se ḳhush hue

zinda diloñ pe rashk to kartī hai maut bhī

ham sarfarosh ahd-e-ilāhī se ḳhush hue

farzīñ ke sāmne hai piyāda Datā huā

ahl-e-bisāt aise sipāhī se ḳhush hue

vo tālibān-e-sar ye musharraf-ba-māl-o-zar

zehnī ġhulām zill-e-ilāhī se ḳhush hue

kyā ḳhaak Tik sakeñge ḳharīde hue gavāh

sarkār aap kaisī gavāhī se ḳhush hue

aate nahīñ haiñ ḳhair ujāle meñ ba.az log

shab-zinda-dār shab kī siyāhī se ḳhush hue

na-KHush gadai se na wo shahi se KHush hue

mazlum zalimon ki tabahi se KHush hue

sad-manzila wo qasr-e-ana Dher ho gaya

ahbab pul-siraat ke rahi se KHush hue

zinda dilon pe rashk to karti hai maut bhi

hum sarfarosh ahd-e-ilahi se KHush hue

farzin ke samne hai piyaada Data hua

ahl-e-bisat aise sipahi se KHush hue

wo taliban-e-sar ye musharraf-ba-mal-o-zar

zehni ghulam zill-e-ilahi se KHush hue

kya KHak Tik sakenge KHaride hue gawah

sarkar aap kaisi gawahi se KHush hue

aate nahin hain KHair ujale mein baz log

shab-zinda-dar shab ki siyahi se KHush hue