na-mehrban agarche kisi ki nazar na thi

nā-mehrbāñ agarche kisī kī nazar na thī

ye aur baat hai ki mire haal par na thī

vo shām-e-be-charāġh muqaddar huī mujhe

jo āshnā-e-jalva-e-rū-e-sahar na thī

bhaTke hue the jāda-e-rāh-e-vafā se ham

jab tak kisī kī yaad sharīk-e-safar na thī

tujh ko mirī nigāh ne DhūñDā hai bārhā

us rahguzar pe bhī jo tirī rahguzar na thī

mahfil meñ the sab apnī jagah mutma.in magar

kyā jaane vo nigāh kidhar thī kidhar na thī

'shafqat' mirā ḳhayāl unheñ kyoñ na aa sakā

un ko mire ḳhayāl se vahshat agar na thī

na-mehrban agarche kisi ki nazar na thi

ye aur baat hai ki mere haal par na thi

wo sham-e-be-charagh muqaddar hui mujhe

jo aashna-e-jalwa-e-ru-e-sahar na thi

bhaTke hue the jada-e-rah-e-wafa se hum

jab tak kisi ki yaad sharik-e-safar na thi

tujh ko meri nigah ne DhunDa hai barha

us rahguzar pe bhi jo teri rahguzar na thi

mahfil mein the sab apni jagah mutmain magar

kya jaane wo nigah kidhar thi kidhar na thi

'shafqat' mera KHayal unhen kyon na aa saka

un ko mere KHayal se wahshat agar na thi