na-saza aalam-e-imkan mein saza lagta hai

nā-sazā ālam-e-imkāñ meñ sazā lagtā hai

nā-ravā bhī kisī mauqe pe ravā lagtā hai

yuuñ to gulshan meñ haiñ sab mudda.ī-e-yak-rañgī

bāvajūd is ke har ik rañg judā lagtā hai

kabhī dushman to kabhī dost kabhī kuchh bhī nahīñ

mujhe ḳhud bhī nahīñ mālūm vo kyā lagtā hai

is kī bātoñ meñ haiñ andāz ġhalat samtoñ ke

ho na ho ye to koī rāh-numā lagtā hai

na haTā is ko mire jism se ai jān-e-hayāt

haath terā mire zaḳhmoñ ko davā lagtā hai

duur se ḳhud mirī sūrat mujhe lagtī hai bhalī

jaane kyuuñ paas se har shaḳhs burā lagtā hai

roktā huuñ to ye ruktā hī nahīñ hai 'ejāz'

mujhe har roz-o-shab-e-vaqt havā lagtā hai

na-saza aalam-e-imkan mein saza lagta hai

na-rawa bhi kisi mauqe pe rawa lagta hai

yun to gulshan mein hain sab muddai-e-yak-rangi

bawajud is ke har ek rang juda lagta hai

kabhi dushman to kabhi dost kabhi kuchh bhi nahin

mujhe KHud bhi nahin malum wo kya lagta hai

is ki baaton mein hain andaz ghalat samton ke

ho na ho ye to koi rah-numa lagta hai

na haTa is ko mere jism se ai jaan-e-hayat

hath tera mere zaKHmon ko dawa lagta hai

dur se KHud meri surat mujhe lagti hai bhali

jaane kyun pas se har shaKHs bura lagta hai

rokta hun to ye rukta hi nahin hai 'ejaz'

mujhe har roz-o-shab-e-waqt hawa lagta hai