na-tawani ke sabab yan kis se uTTha jae hai

nā-tavānī ke sabab yaañ kis se uTThā jaa.e hai

aah uThne kī kaheñ kyā dam hī baiThā jaa.e hai

naza.a meñ har-chand ham chāheñ haiñ do bāteñ kareñ

kyā kareñ maqdūr kab hai kis se bolā jaa.e hai

aamad o raft un kī yaañ sā.at-ba-sā.at hai vahī

kab tabīboñ kā hamāre sar se balvā jaa.e hai

jā-e-riqqat hai mirī hālat to ab ai ham-nashīñ

paañv kyā sīdhe karūñ maiñ dam hī ulTā jaa.e hai

teġh-e-abrū tīr-e-mizhgāñ sab rakhe haiñ saan par

in dinoñ us kī taraf kab ham se dekhā jaa.e hai

zaḳhm-e-dil se mujh ko ik aatī hai bū-e-uns sī

us ke kūche kī taraf shāyad ye rastā jaa.e hai

'mus.hafī' tū ishq kī vaadī meñ āḳhir luT gayā

is bayābāñ meñ koī nādān tanhā jaa.e hai

na-tawani ke sabab yan kis se uTTha jae hai

aah uThne ki kahen kya dam hi baiTha jae hai

naza mein har-chand hum chahen hain do baaten karen

kya karen maqdur kab hai kis se bola jae hai

aamad o raft un ki yan saat-ba-saat hai wahi

kab tabibon ka hamare sar se balwa jae hai

ja-e-riqqat hai meri haalat to ab ai ham-nashin

panw kya sidhe karun main dam hi ulTa jae hai

tegh-e-abru tir-e-mizhgan sab rakhe hain san par

in dinon us ki taraf kab hum se dekha jae hai

zaKHm-e-dil se mujh ko ek aati hai bu-e-uns si

us ke kuche ki taraf shayad ye rasta jae hai

'mushafi' tu ishq ki wadi mein aaKHir luT gaya

is bayaban mein koi nadan tanha jae hai