na wo masarrat gunah mein hai na wo kashish ab sawab mein hai

nā vo masarrat gunāh meñ hai na vo kashish ab savāb meñ hai

ḳharāb-e-sāmān-e-zindagī sab jahāñ kī bazm-e-ḳharāb meñ hai

hasīn be-shak hai bazm-e-anjum qamar bhī haañ kuchh hisāb meñ hai

magar yahāñ tū hī tū hai yaktā savāl tere javāb meñ hai

yahāñ hai bekār us kī hasrat yahāñ kī vo chiiz hī nahīñ hai

kare vo rāhat kī justujū kyuuñ jo is jahān-e-ḳharāb meñ hai

paḌī hai bebāk jis pe us ko pilā diyā ek jām-e-mastī

balā kī mastī bharī huī us nigāh-e-mast-e-shabāb meñ hai

badal ga.ī hai nigāh-e-sāqī to rañg-e-mahfil badal gayā hai

na ab vo pahlī sī mai-kashī hai na vo mazā ab sharāb meñ hai

sunā thā ham ne ki hashr meñ vo dikhāne vaale haiñ apnā jalva

magar jo dekhā to aaj bhī vo jamāl-e-rañgīñ naqāb meñ hai

dikhā rahā hai uchhal uchhal kar ye sab ko josh-e-numūd-e-ġhāfil

ki goyā dariyā-e-be-karāñ ik nihāñ jahān-e-habāb meñ hai

kahāñ vo naġhmoñ meñ soz-e-mutrib kahāñ vo aish-o-tarab kī duniyā

kahāñ vo pahlā sā kaif baaqī sadā-e-chang-o-rabāb meñ hai

hazāroñ rañgīniyāñ bhī dekhīñ hazār jalve bhī ham ne dekhe

magar jo phir ġhaur kar ke dekhā to husn-e-mutlaq hijāb meñ hai

jahāñ ke sab ranj-o-ġham miTā de mire muqaddar ko phir jagā de

ilāhī 'ḳhushtar' kī iltijā ye mudām terī janāb meñ hai

na wo masarrat gunah mein hai na wo kashish ab sawab mein hai

KHarab-e-saman-e-zindagi sab jahan ki bazm-e-KHarab mein hai

hasin be-shak hai bazm-e-anjum qamar bhi han kuchh hisab mein hai

magar yahan tu hi tu hai yakta sawal tere jawab mein hai

yahan hai bekar us ki hasrat yahan ki wo chiz hi nahin hai

kare wo rahat ki justuju kyun jo is jahan-e-KHarab mein hai

paDi hai bebak jis pe us ko pila diya ek jam-e-masti

bala ki masti bhari hui us nigah-e-mast-e-shabab mein hai

badal gai hai nigah-e-saqi to rang-e-mahfil badal gaya hai

na ab wo pahli si mai-kashi hai na wo maza ab sharab mein hai

suna tha hum ne ki hashr mein wo dikhane wale hain apna jalwa

magar jo dekha to aaj bhi wo jamal-e-rangin naqab mein hai

dikha raha hai uchhal uchhal kar ye sab ko josh-e-numud-e-ghafil

ki goya dariya-e-be-karan ek nihan jahan-e-habab mein hai

kahan wo naghmon mein soz-e-mutrib kahan wo aish-o-tarab ki duniya

kahan wo pahla sa kaif baqi sada-e-chang-o-rabab mein hai

hazaron ranginiyan bhi dekhin hazar jalwe bhi hum ne dekhe

magar jo phir ghaur kar ke dekha to husn-e-mutlaq hijab mein hai

jahan ke sab ranj-o-gham miTa de mere muqaddar ko phir jaga de

ilahi 'KHushtar' ki iltija ye mudam teri janab mein hai