nadida manzilon ke payambar bahut mile

nādīda manziloñ ke payambar bahut mile

ham ko hamārī raah ke patthar bahut mile

dard-āshnā ḳhulūs ke paikar bahut mile

zaḳhmoñ ko DhūñDte hue nashtar bahut mile

siine se ham lagā.e hue the matā’-e-dard

ham se mile bhī log to bach kar bahut mile

kis kis ko apne dil meñ ham āḳhir utārte

jo ham pe mehrbāñ the vo ḳhanjar bahut mile

yādoñ ke zaḳhm dil kā lahū dard-e-be-kasī

kūche meñ zindagī ke sitamgar bahut mile

dekhā jidhar lagī thī shikasta diloñ kī bhiiḌ

ābādiyoñ meñ ujḌe hue ghar bahut mile

palkoñ pe apnī ḳhuub ugī āñsuoñ kī fasl

in ḳhushk Dāliyoñ pe gul-e-tar bahut mile

bheje haiñ us ne kitne mohabbat-bhare ḳhutūt

ham ko hamāre qatl ke mahzar bahut mile

ai 'badr' dil ke daaġh the rātoñ ko zau-fishāñ

tīra-shabī meñ chāñd se paikar bahut mile

nadida manzilon ke payambar bahut mile

hum ko hamari rah ke patthar bahut mile

dard-ashna KHulus ke paikar bahut mile

zaKHmon ko DhunDte hue nashtar bahut mile

sine se hum lagae hue the mata’-e-dard

hum se mile bhi log to bach kar bahut mile

kis kis ko apne dil mein hum aaKHir utarte

jo hum pe mehrban the wo KHanjar bahut mile

yaadon ke zaKHm dil ka lahu dard-e-be-kasi

kuche mein zindagi ke sitamgar bahut mile

dekha jidhar lagi thi shikasta dilon ki bhiD

aabaadiyon mein ujDe hue ghar bahut mile

palkon pe apni KHub ugi aansuon ki fasl

in KHushk Daliyon pe gul-e-tar bahut mile

bheje hain us ne kitne mohabbat-bhare KHutut

hum ko hamare qatl ke mahzar bahut mile

ai 'badr' dil ke dagh the raaton ko zau-fishan

tira-shabi mein chand se paikar bahut mile