nakaamiyon ka gham sar-e-manzil nahin raha

nākāmiyoñ kā ġham sar-e-manzil nahīñ rahā

ab dil kisī bhī raah ke qābil nahīñ rahā

sahnī paḌīñ kuchh itnī zamāne kī saḳhtiyāñ

dil un kī aarzū pe bhī maa.il nahīñ rahā

ai bārgāh-e-husn ye kyā vaqt aa gayā

tere karam kā ab koī saa.il nahīñ rahā

pāmāl-e-huzn-o-ġhaflat-o-ġham kī ye laash hai

ab bhī kaheñge aap maiñ ġhāfil nahīñ rahā

ab dil hai aur ārzū-e-tark-e-shauq hai

ab dil kisī ke 'ishq ke qābil nahīñ rahā

kyā hādsāt-e-zīst ke ham nazr ho ga.e

lutf-o-karam kisī kā jo shāmil nahīñ rahā

'asmā' chahal-pahal thī vo majnūñ se dasht meñ

ab dil-rubā nazāra-e-mahmil nahīñ rahā

nakaamiyon ka gham sar-e-manzil nahin raha

ab dil kisi bhi rah ke qabil nahin raha

sahni paDin kuchh itni zamane ki saKHtiyan

dil un ki aarzu pe bhi mail nahin raha

ai bargah-e-husn ye kya waqt aa gaya

tere karam ka ab koi sail nahin raha

pamal-e-huzn-o-ghaflat-o-gham ki ye lash hai

ab bhi kahenge aap main ghafil nahin raha

ab dil hai aur aarzu-e-tark-e-shauq hai

ab dil kisi ke 'ishq ke qabil nahin raha

kya hadsat-e-zist ke hum nazr ho gae

lutf-o-karam kisi ka jo shamil nahin raha

'asma' chahal-pahal thi wo majnun se dasht mein

ab dil-ruba nazara-e-mahmil nahin raha