nala-e-dil ki sada diwar mein hai dar mein hai

nāla-e-dil kī sadā dīvār meñ hai dar meñ hai

suur yā mahshar meñ hogā yā hamāre ghar meñ hai

yuuñ to marne ko marūñgā maiñ magar miTTī mirī

yā falak ke haath meñ yā aap kī Thokar meñ hai

maiñ pareshāñ ho ke niklūñgā to un kī bazm se

merī barbādī kā sāmāñ hai to un ke ghar meñ hai

vo agar dekheñ to ab hālat sañbhaltī hai mirī

vo agar pūchheñ to ab mujh ko shifā dam-bhar meñ hai

ye nahīñ mauqa hañsī kā tum nazar badle raho

ab qazā merī isī bigḌe hue tevar meñ hai

de de chullū meñ ikaTThī kar ke ai saaqī mujhe

kuchh abhī to ḳhum meñ hai shīshe meñ hai sāġhar meñ hai

naqd-e-jāñ lene ko maqtal meñ qazā nudrat mirī

ban ke dulhan rūnumā ā.īna-e-ḳhanjar meñ hai

nala-e-dil ki sada diwar mein hai dar mein hai

sur ya mahshar mein hoga ya hamare ghar mein hai

yun to marne ko marunga main magar miTTi meri

ya falak ke hath mein ya aap ki Thokar mein hai

main pareshan ho ke niklunga to un ki bazm se

meri barbaadi ka saman hai to un ke ghar mein hai

wo agar dekhen to ab haalat sanbhalti hai meri

wo agar puchhen to ab mujh ko shifa dam-bhar mein hai

ye nahin mauqa hansi ka tum nazar badle raho

ab qaza meri isi bigDe hue tewar mein hai

de de chullu mein ikaTThi kar ke ai saqi mujhe

kuchh abhi to KHum mein hai shishe mein hai saghar mein hai

naqd-e-jaan lene ko maqtal mein qaza nudrat meri

ban ke dulhan runuma aaina-e-KHanjar mein hai