nala-e-dil mein mere ab wo asar ho ki na ho

nāla-e-dil meñ mire ab vo asar ho ki na ho

kyā patā un ko mire ġham kī ḳhabar ho ki na ho

haiñ farozāñ mire dil meñ tirī yādoñ ke charāġh

ġham nahīñ koī shab-e-ġham kī sahar ho ki na ho

raqs to kar luuñ zarā mauj-e-sabā kī gat par

phir gulistāñ meñ bahāroñ kā guzar ho ki na ho

ab bhī vābasta hai dil se mire ummīd-e-karam

laġhzishoñ par mirī rahmat kī nazar ho ki na ho

ham bhī mushtāq haiñ lutf-e-nigah-e-jānāñ ke

dekhiye chashm-e-karam un kī idhar ho ki na ho

baat āfiyyat-e-sāhil kī to kar luuñ kuchh der

bahr-e-ālām kī maujoñ se mafar ho ki na ho

kar lo taz.īn-e-ġhazal dil ke lahū se 'nāsir'

taaza is tarah se phir zaḳhm-e-jigar ho ki na ho

nala-e-dil mein mere ab wo asar ho ki na ho

kya pata un ko mere gham ki KHabar ho ki na ho

hain farozan mere dil mein teri yaadon ke charagh

gham nahin koi shab-e-gham ki sahar ho ki na ho

raqs to kar lun zara mauj-e-saba ki gat par

phir gulistan mein bahaaron ka guzar ho ki na ho

ab bhi wabasta hai dil se mere ummid-e-karam

laghzishon par meri rahmat ki nazar ho ki na ho

hum bhi mushtaq hain lutf-e-nigah-e-jaanan ke

dekhiye chashm-e-karam un ki idhar ho ki na ho

baat aafiyyat-e-sahil ki to kar lun kuchh der

bahr-e-alam ki maujon se mafar ho ki na ho

kar lo tazin-e-ghazal dil ke lahu se 'nasir'

taza is tarah se phir zaKHm-e-jigar ho ki na ho