nala-kun hijr ki shab ko dil-e-na-saz nahin

nāla-kun hijr kī shab ko dil-e-nā-sāz nahīñ

kyoñ buland ab mire bīmār kī āvāz nahīñ

gar mizāj aaj kisī shoḳh kā nā-sāz nahīñ

kisī liye bazm meñ phir chang kī āvāz nahīñ

taḌap utnī nahīñ tezī nahīñ āvāz nahīñ

barq meñ bhī dil-e-betāb kā andāz nahīñ

chupke chupke kiyā dil nāvak-e-mizhgāñ se hadaf

hai ta.ajjub ki par-e-tīr kī āvāz nahīñ

dil taḌaptā hai mirā tā.ir-e-bismil kī tarah

ruuh qālib meñ nahīñ tāqat-e-parvāz nahīñ

vā.izoñ kā ye nahīñ qaul-e-daroġh ai rindo

hashr nazdīk hai ye duur kī āvāz nahīñ

arinī maiñ jo kahūñ jalva nazar aa.e kalīm

lan-tarānī kī mire vāste āvāz nahīñ

tā.er-e-qibla-numā kahtā hai muztar ho kar

murġh-e-bismil kī tarah tāqat-e-parvāz nahīñ

gard-bād uTh ke mirī ḳhaak kā ye kahtā hai

ḳhāksāroñ meñ koī mujh sā sar-afrāz nahīñ

daar par chaḌh ke ye mansūr sadā detā hai

aaj mujh sā koī aalam meñ sar-afrāz nahīñ

is mire dil kā uḌā de jo nishāna koī

dahr meñ kyā koī aisā qadar-andāz nahīñ

gul-o-bulbul ko judā baaġh se kar detā hai

tujh sā sayyād koī tafraqa-andāz nahīñ

phūñk detīñ to ye sayyād kā ghar nāloñ se

andalīboñ kī magar sho.ala-e-āvāz nahīñ

saikḌoñ āshiq-o-māshūq chhuḌā.e tū ne

ai ajal tujh sā koī tafraqa-andāz nahīñ

bāda-ḳhvāroñ pe ghaTā ġham kī na kyūñkar chhā.e

dil khule kyā dar-e-mai-ḳhāna agar baaz nahīñ

band ho ho ga.iiñ yuuñ bulbul-e-dil se merī

andalībān-e-chaman zamzama-pardāz nahīñ

jis tarah jaan bachā.ī mai-e-vaslat ne mirī

pur-asar aisā koī sharbat-e-e.ajāz nahīñ

qabr meñ kyoñ na akele mirā jī ghabrā.e

koī mūnis nahīñ yāvar nahīñ dam-sāz nahīñ

paar nāvak na huā toḌ ke dil ko mere

zor baazū meñ tire o qadar-andāz nahīñ

kāTtā kyoñ hai tū qaiñchī se ise ai sayyād

par jo do-chār haiñ ye qabil-e-parvāz nahīñ

qabr par aa ke bhī dil pīsne aa.e ho mirā

paañv rakhne kā lahad par to ye andāz nahīñ

sūrat-e-ashk magar ahl-e-adam jaate haiñ

hai ravāñ qāfila par zang kī āvāz nahīñ

baaġh vīrān kiyā bād-e-ḳhizāñ ne aisā

ham-safīrān-e-chaman kī kahīñ āvāz nahīñ

ho ga.ī band zabāñ jald ḳhabar le iisā

hichkiyoñ kī tire bīmār meñ āvāz nahīñ

sard aahoñ se ho kyā sirr-e-mohabbat zāhir

bū-e-ġhuncha kī tarah dil meñ mire raaz nahīñ

is tarah kufr kī aalam meñ huī hai kasrat

masjidoñ tak meñ azānoñ kī bhī āvāz nahīñ

aaj kyā mar ga.e zindāñ meñ tumhāre qaidī

ḳhair ho kyoñ ġhul-o-zanjīr kī āvāz nahīñ

daur hai mehdī-e-dīñ kā jo jahān meñ 'fāḳhir'

but-kadoñ meñ kahīñ nāqūs kī āvāz nahīñ

nala-kun hijr ki shab ko dil-e-na-saz nahin

kyon buland ab mere bimar ki aawaz nahin

gar mizaj aaj kisi shoKH ka na-saz nahin

kisi liye bazm mein phir chang ki aawaz nahin

taDap utni nahin tezi nahin aawaz nahin

barq mein bhi dil-e-betab ka andaz nahin

chupke chupke kiya dil nawak-e-mizhgan se hadaf

hai tajjub ki par-e-tir ki aawaz nahin

dil taDapta hai mera tair-e-bismil ki tarah

ruh qalib mein nahin taqat-e-parwaz nahin

waizon ka ye nahin qaul-e-darogh ai rindo

hashr nazdik hai ye dur ki aawaz nahin

arini main jo kahun jalwa nazar aae kalim

lan-tarani ki mere waste aawaz nahin

taer-e-qibla-numa kahta hai muztar ho kar

murgh-e-bismil ki tarah taqat-e-parwaz nahin

gard-baad uTh ke meri KHak ka ye kahta hai

KHaksaron mein koi mujh sa sar-afraaz nahin

dar par chaDh ke ye mansur sada deta hai

aaj mujh sa koi aalam mein sar-afraaz nahin

is mere dil ka uDa de jo nishana koi

dahr mein kya koi aisa qadar-andaz nahin

gul-o-bulbul ko juda bagh se kar deta hai

tujh sa sayyaad koi tafraqa-andaz nahin

phunk detin to ye sayyaad ka ghar nalon se

andalibon ki magar shoala-e-awaz nahin

saikDon aashiq-o-mashuq chhuDae tu ne

ai ajal tujh sa koi tafraqa-andaz nahin

baada-KHwaron pe ghaTa gham ki na kyunkar chhae

dil khule kya dar-e-mai-KHana agar baz nahin

band ho ho gain yun bulbul-e-dil se meri

andaliban-e-chaman zamzama-pardaz nahin

jis tarah jaan bachai mai-e-waslat ne meri

pur-asar aisa koi sharbat-e-eajaz nahin

qabr mein kyon na akele mera ji ghabrae

koi munis nahin yawar nahin dam-saz nahin

par nawak na hua toD ke dil ko mere

zor bazu mein tere o qadar-andaz nahin

kaTta kyon hai tu qainchi se ise ai sayyaad

par jo do-chaar hain ye qabil-e-parwaz nahin

qabr par aa ke bhi dil pisne aae ho mera

panw rakhne ka lahad par to ye andaz nahin

surat-e-ashk magar ahl-e-adam jate hain

hai rawan qafila par zang ki aawaz nahin

bagh viran kiya baad-e-KHizan ne aisa

ham-safiran-e-chaman ki kahin aawaz nahin

ho gai band zaban jald KHabar le isa

hichkiyon ki tere bimar mein aawaz nahin

sard aahon se ho kya sirr-e-mohabbat zahir

bu-e-ghuncha ki tarah dil mein mere raaz nahin

is tarah kufr ki aalam mein hui hai kasrat

masjidon tak mein azanon ki bhi aawaz nahin

aaj kya mar gae zindan mein tumhaare qaidi

KHair ho kyon ghul-o-zanjir ki aawaz nahin

daur hai mehdi-e-din ka jo jahan mein 'faKHir'

but-kadon mein kahin naqus ki aawaz nahin