nala shab-e-firaq jo koi nikal gaya

naala shab-e-firāq jo koī nikal gayā

josh-e-junūñ se chiir ke cahrḳh-o-zuhal gayā

pūchhā mizāj is kā jo rashk-e-masīh ne

le kar marīz-e-ishq sambhālā sambhal gayā

niklī zabān-e-sham.a se kyā baat raat ko

sunte hī jis ko bazm meñ parvāna jal gayā

ahd-e-shabāb chashm-e-zadan meñ huā tamām

jhoñkā thā ik nasīm kā aa kar nikal gayā

dār-e-fanā meñ kaun hai jis ko qayām hai

koī yahāñ se aaj gayā koī kal gayā

kaisā hī koī kyuuñ na ho koī chālāk shahsavār

guzrā jo rāh-e-ishq meñ vo sar ke bal gayā

ab aa.ī raat dekheñ guzartī hai kis tarah

banda-navāz din to bahānoñ meñ Tal gayā

ye tā.ir-e-nafas bhī to vāpas na aa.egā

jab chhoḌ kar badan ke qafas se nikal gayā

lutf-e-kalām-e-'mashriqī' us ko rahā bhī yaad

sun kar mushā.irā meñ jo merī ġhazal gayā

nala shab-e-firaq jo koi nikal gaya

josh-e-junun se chir ke cahrKH-o-zuhal gaya

puchha mizaj is ka jo rashk-e-masih ne

le kar mariz-e-ishq sambhaala sambhal gaya

nikli zaban-e-shama se kya baat raat ko

sunte hi jis ko bazm mein parwana jal gaya

ahd-e-shabab chashm-e-zadan mein hua tamam

jhonka tha ek nasim ka aa kar nikal gaya

dar-e-fana mein kaun hai jis ko qayam hai

koi yahan se aaj gaya koi kal gaya

kaisa hi koi kyun na ho koi chaalak shahsawar

guzra jo rah-e-ishq mein wo sar ke bal gaya

ab aai raat dekhen guzarti hai kis tarah

banda-nawaz din to bahanon mein Tal gaya

ye tair-e-nafas bhi to wapas na aaega

jab chhoD kar badan ke qafas se nikal gaya

lutf-e-kalam-e-'mashriqi' us ko raha bhi yaad

sun kar mushaira mein jo meri ghazal gaya