nama-bar aate rahe jate rahe

nāma-bar aate rahe jaate rahe

hijr meñ yuuñ dil ko bahlāte rahe

ye bhī kyā kam hai ki mere haal par

der tak vo ġhaur farmāte rahe

shiddat-e-ehsās-e-tanhā.ī na pūchh

ham bharī mahfil meñ ghabrāte rahe

hijr kī tārīkiyāñ baḌhtī ga.iiñ

mahr o mah aate rahe jaate rahe

koī kyā jānegā ye rāz-o-niyāz

dil hameñ ham dil ko samjhāte rahe

manzil-e-maqsūd par pahuñche vahī

raah meñ jo Thokareñ khāte rahe

nashsha-e-mai tez-tar hotā gayā

shaiḳh sāhab va.az farmāte rahe

kyā ajab shai hai matā-e-dil 'sahar'

jo use khote rahe paate rahe

nama-bar aate rahe jate rahe

hijr mein yun dil ko bahlate rahe

ye bhi kya kam hai ki mere haal par

der tak wo ghaur farmate rahe

shiddat-e-ehsas-e-tanhai na puchh

hum bhari mahfil mein ghabraate rahe

hijr ki tarikiyan baDhti gain

mahr o mah aate rahe jate rahe

koi kya jaanega ye raaz-o-niyaz

dil hamein hum dil ko samjhate rahe

manzil-e-maqsud par pahunche wahi

rah mein jo Thokaren khate rahe

nashsha-e-mai tez-tar hota gaya

shaiKH sahab waz farmate rahe

kya ajab shai hai mata-e-dil 'sahar'

jo use khote rahe pate rahe