nama-bar tu ne chiTThiyan di hain

nāma-bar tū ne chiTThiyāñ dī haiñ

yā lifāfe meñ siskiyāñ dī haiñ

tum mirī chashm-e-ḳhushk mat dekho

is ne sahrā ko naddiyāñ dī haiñ

chhīn kar ḳhvāb merī āñkhoñ se

niiñd kī us ne goliyāñ dī haiñ

ham ne ulfat kī bhiik māñgī thī

us ne kaase meñ jhiḌkiyāñ dī haiñ

tairtī haiñ vo reg-zāroñ meñ

hijr ne kaisī kashtiyāñ dī haiñ

ḳhuub ham ko milī hai āzādī

jis ne hoñToñ ko beḌiyāñ dī haiñ

phuus kā ghar thā jis ne vaqf kiyā

us ne tohfe meñ āñdhiyāñ dī haiñ

jhuum uTThī hai ik udaas kalī

us ke hāthoñ meñ titliyāñ dī haiñ

nanhe hāthoñ se taḳhtiyāñ le kar

aaj kis ne ye barchhiyāñ dī haiñ

nama-bar tu ne chiTThiyan di hain

ya lifafe mein siskiyan di hain

tum meri chashm-e-KHushk mat dekho

is ne sahra ko naddiyan di hain

chhin kar KHwab meri aankhon se

nind ki us ne goliyan di hain

hum ne ulfat ki bhik mangi thi

us ne kase mein jhiDkiyan di hain

tairti hain wo reg-zaron mein

hijr ne kaisi kashtiyan di hain

KHub hum ko mili hai aazadi

jis ne honTon ko beDiyan di hain

phus ka ghar tha jis ne waqf kiya

us ne tohfe mein aandhiyan di hain

jhum uTThi hai ek udas kali

us ke hathon mein titliyan di hain

nanhe hathon se taKHtiyan le kar

aaj kis ne ye barchhiyan di hain