naseh ko jeb sine se fursat kabhu na ho

nāseh ko jeb siine se fursat kabhū na ho

dil yaar se phaTe to kisī se rafū na ho

is dil ko de ke luuñ do jahāñ ye kabhū na ho

saudā to hove tab ye ki jab us meñ tū na ho

ā.īna-e-vajūd adam meñ agar tirā

vo darmiyāñ na ho to kahīñ ham ko rū na ho

jhagḌā to husn o ishq kā chuktā hai pal ke biich

gar mahkame meñ qaazī ke tū rū-ba-rū na ho

qatre kī khul ga.ī hai girah varna ai nasīm

shor-e-dimāġh murġh-e-chaman gul kī bū na ho

guzre so guzre ahl-e-zamīñ uupar ai falak

ā.inda yaañ talak to koī ḳhūb-rū na ho

dil le ke tujh se barq ke shole ko dījiye

par hai ye Dar ki us kī bhī aisī hī ḳhū na ho

gul kī na tuḳhm murġh-e-chaman kar sake talāsh

ham ḳhām-fitratoñ se tirī justujū na ho

'saudā' badal ke qāfiya tū is ġhazal ko kah

ai be-adab tū dard se bas dū-ba-dū na ho

naseh ko jeb sine se fursat kabhu na ho

dil yar se phaTe to kisi se rafu na ho

is dil ko de ke lun do jahan ye kabhu na ho

sauda to howe tab ye ki jab us mein tu na ho

aaina-e-wajud adam mein agar tera

wo darmiyan na ho to kahin hum ko ru na ho

jhagDa to husn o ishq ka chukta hai pal ke bich

gar mahkame mein qazi ke tu ru-ba-ru na ho

qatre ki khul gai hai girah warna ai nasim

shor-e-dimagh murgh-e-chaman gul ki bu na ho

guzre so guzre ahl-e-zamin upar ai falak

aainda yan talak to koi KHub-ru na ho

dil le ke tujh se barq ke shole ko dijiye

par hai ye Dar ki us ki bhi aisi hi KHu na ho

gul ki na tuKHm murgh-e-chaman kar sake talash

hum KHam-fitraton se teri justuju na ho

'sauda' badal ke qafiya tu is ghazal ko kah

ai be-adab tu dard se bas du-ba-du na ho