nashad dil ho shad mah-e-wasl-e-yar se

nāshād dil ho shaad mah-e-vasl-e-yār se

yā-rab mirī ḳhizāñ ko badal de bahār se

kyā kaam kar gayā asar-e-iztirāb-e-dil

vo bhī haiñ aaj merī tarah be-qarār se

gum ho rahā huuñ jalva-e-jānāñ kī raah meñ

ghabrā rahā huuñ kaif-e-hujūm-e-bahār se

ai be-ḳhudī-e-shauq vahāñ tak pahuñch bhī jā

ḳhud ko bachā ke gardish-e-lail-o-nahār se

majbūr huuñ kashākash-e-husn-e-nigāh meñ

be-iḳhtiyār huuñ ġham-e-be-iḳhtiyār se

'maḳhmūr' merā josh-e-junūñ bhī ajiib hai

dāman ko sī rahā huuñ garebāñ ke taar se

nashad dil ho shad mah-e-wasl-e-yar se

ya-rab meri KHizan ko badal de bahaar se

kya kaam kar gaya asar-e-iztirab-e-dil

wo bhi hain aaj meri tarah be-qarar se

gum ho raha hun jalwa-e-jaanan ki rah mein

ghabra raha hun kaif-e-hujum-e-bahaar se

ai be-KHudi-e-shauq wahan tak pahunch bhi ja

KHud ko bacha ke gardish-e-lail-o-nahaar se

majbur hun kashakash-e-husn-e-nigah mein

be-iKHtiyar hun gham-e-be-iKHtiyar se

'maKHmur' mera josh-e-junun bhi ajib hai

daman ko si raha hun gareban ke tar se